കേരളീയം സാംസ്കാരിക പ്രഭാഷണം

തിരുവനന്തപുരം: കേരളീയം സാംസ്കാരികോത്സവത്തോടനുബന്ധിച്ച്​ നടത്തുന്ന പൊതുപ്രഭാഷണത്തിൽ സംവിധായകനും മാധ്യമപ്രവർത്തകനുമായ ഷമീർ ഭരതന്നൂർ സംസാരിക്കും. നവംബർ നാല്​ ശനിയാഴ്​ച്ച വൈകുന്നേരം ആറിന്​ ഗാന്ധിപാർക്കിലാണ്​ പ്രഭാഷണം നടക്കുക. കേരളീയത്തോടനുബന്ധിച്ച്​ നടത്തുന്ന വിവിധ സാംസ്കാരിക പരിപാടികളുടെ ഭാഗമായാണ്​ പ്രഭാഷണം സംഘടിപ്പിച്ചിരിക്കുന്നത്​.

കേരളം കൈവരിച്ച നേട്ടങ്ങളെയും വിവിധ മേഖലകൾ നേരിടുന്ന പ്രശ്‌നങ്ങളെയും മുന്നോട്ടുള്ള സാധ്യതകളെയുംക്കുറിച്ചുള്ള സംവാദങ്ങളും, തനത് വിഭവങ്ങളെയും സാംസ്‌കാരിക പൈതൃകത്തെയും കാർഷിക-വ്യവസായ പുരോഗതിയെയും നൂതന സാങ്കേതികവിദ്യ രംഗത്തെ നേട്ടങ്ങളെയും വിളിച്ചറിയിക്കുന്ന പ്രദർശനങ്ങളും കേരളീയത്തിന്റെ ഭാഗമായി നടക്കുന്നുണ്ട്​. കേരളത്തിന്റെ വികസന മാതൃകകൾ ലോകത്തിനു മുമ്പാകെ അവതരിപ്പിക്കുന്നതിനൊപ്പം ലോക വൈജ്ഞാനിക രംഗത്തു നിന്ന് പുതിയ ആശയങ്ങൾ സ്വാംശീകരിക്കാനും പരിപാടി സഹായിക്കും.

എല്ലാ വർഷവും കേരള പിറവി ദിനത്തോടനുബന്ധിച്ചു ഒരാഴ്ച നീണ്ടു നിൽക്കുന്ന ആഘോഷമായാണ് കേരളീയം വിഭാവനം ചെയ്തിട്ടുള്ളത്. ആദ്യ എഡിഷൻ നവംബർ 1 മുതൽ 7 വരെ തിരുവനന്തപുരത്ത് വിവിധ വേദികളിലായി നടക്കും.