കോവിഡ്​ പ്രതിരോധം: കേരളം ഈ മൂന്ന്​ കാര്യങ്ങളിൽ പിന്നിലെന്ന്​ കേന്ദ്രസംഘം

ന്യൂഡൽഹി: കോവിഡ്​ പ്രതിരോധത്തിൽ തുടക്കത്തിൽ മികച്ച പ്രവർത്തനം കാഴ്ചവെച്ച കേരളം നിലവിൽ മൂന്ന്​ കാര്യങ്ങളിൽ പിന്നിലാണെന്ന്​ എൻ.സി.ഡി.സി (നാഷനൽ സെന്‍റർ ഫോർ ഡിസീസ് കൺട്രോൾ) ഡയറക്ടർ ഡോ. സുജീത് കുമാർ സിങ്​. സംസ്ഥാനത്തെ കോവിഡ് സാഹചര്യം വിലയിരുത്താൻ കഴിഞ്ഞയാഴ്ച കേരളം സന്ദർശിച്ച കേന്ദ്രസംഘത്തിന്‍റെ തലവനായിരുന്നു ഡോ. സിങ്​.

കേരളത്തിലെ കോവിഡ്​ പ്രതിരോധത്തിൽ ഇപ്പോൾ പാളിച്ചകളുണ്ടെന്നും സർക്കാറിന്‍റെ പ്രവർത്തനം അപര്യാപ്തമാണെന്നും അദ്ദേഹം പറഞ്ഞു. കേരളം രാജ്യത്തെ മറ്റു സംസ്​ഥാനങ്ങൾക്ക്​ മാതൃകയാണെന്ന പ്രഫ. ഗഗൻദീപ് കാങ്ങിന്‍റെ വാദത്തോട് അദ്ദേഹം വിയോജിപ്പ്​ രേഖപ്പെടുത്തി.

അതേസമയം, കേരളത്തിൽ കൂടുതൽ പേർക്ക്​ വാക്​സിൻ നൽകിയതിനെയും കോവിഡിന്‍റെ തുടക്കത്തിൽ തന്നെ ആളുകളെ സംരക്ഷിക്കാൻ സ്വീകരിച്ച ഫലപ്രദമായ നടപടികളെയും ഡോ. സിങ്​ പ്രശംസിച്ചു.

രോഗവ്യാപന സാഹചര്യത്തിൽ ആഗസ്റ്റ്​ 16 ന് തുടങ്ങാനിരിക്കുന്ന ബി.ജെ.പിയുടെ ജൻ ആശിർവാദ് യാത്ര ഒഴിവാക്കണമെന്ന് ഡോ. സുജീത് കുമാർ ആവശ്യപ്പെട്ടു. സൂപ്പർ-സ്പ്രെഡിങ്​ പരിപാടികൾ നടത്തരുത്​. ആൾക്കൂട്ടം തടിച്ചുകൂടുന്ന പരിപാടികൾ രോഗം പടരാൻ ഇടയാക്കുമെന്നും അദ്ദേഹം 'ദി വയറി'ന്​ നൽകിയ അഭിമുഖത്തിൽ പറഞ്ഞു.

ഡോ. സുജീത് കുമാർ സിങ്​ ചൂണ്ടിക്കാട്ടിയ മൂന്നുകാര്യങ്ങൾ

ഒന്ന്​: രോഗി സമ്പർക്കം കൃത്യമായി കണ്ടെത്തുന്നില്ല.

പല കേസുകളിലും രോഗബാധിതരുടെ വീട്ടിലെ സമ്പർക്കം പോലും കൃത്യമായി കണ്ടെത്തി പരിശോധിച്ചിട്ടില്ലെന്ന് അദ്ദേഹം പറഞ്ഞു. കേന്ദ്ര സംഘം സന്ദർശിച്ച എട്ട് ജില്ലകളിലെ രോഗവ്യാപന തോത്​ 1: 1.2 നും 1: 1.7 നും ഇടയിലാണ്. രോഗബാധിതരുടെ സമ്പർക്ക പട്ടികയിലുള്ള 15 പേരെയെങ്കിലും നിരീക്ഷിക്കണമെന്നും അദ്ദേഹം ആവശ്യപ്പെട്ടു.

രണ്ട്​: വീടുകളിൽ കഴിയുന്ന രോഗികളെ നിരീക്ഷിക്കുന്നില്ല

കേരളത്തിലെ 80 ശതമാനം കോവിഡ് രോഗികളും ഹോം ഐസൊലേഷനിലാണ്​. എന്നാൽ, ഇവരെ സർക്കാർ ശരിയായി നിരീക്ഷിക്കുന്നില്ല. ഇത് ആശങ്കാജനകമാണ്. ഐസൊലേഷനിലുള്ളവർ പലപ്പോഴും അയൽപക്കത്തും മറ്റും പോവുകയും ഇടപെടുകയും ചെയ്യുന്നുവെന്ന വാർത്തകൾ സത്യമാണെന്നും അദ്ദേഹം പറഞ്ഞു.

മൂന്ന്​: വടക്കൻ ജില്ലകളിലെ ആരോഗ്യ സംവിധാനങ്ങൾ അതീവസമ്മർദത്തിൽ.

മലപ്പുറമടക്കം വടക്കൻ ജില്ലകളിലെ ഐ.സി.യു ഉൾപ്പെടെയുള്ള ആരോഗ്യ പരിരക്ഷാ സംവിധാനങ്ങൾ കടുത്ത സമ്മർദത്തിലാ​െണന്ന്​ ഡോ. സിങ്​ ചൂണ്ടിക്കാട്ടി. മലപ്പുറത്ത് ആശുപത്രികൾ ഏതാണ്ട് 90 ശതമാനവും നിറഞ്ഞിരിക്കുന്നു. സംസ്​ഥാനത്ത്​ പ്രതിദിനം 20,000ൽ കൂടുതൽ കേസുകൾ റിപ്പോർട്ട്​ ചെയ്യുന്ന സാഹചര്യത്തിൽ പല വടക്കൻ ജില്ലകളിലും ഐ.സി.യു, വെന്‍റിലേറ്റർ സൗകര്യങ്ങൾ അപര്യാപ്​തമാക​ുമെന്ന്​ അദ്ദേഹം മുന്നറിയിപ്പ്​ നൽകുന്നു. എങ്കിലും കേരളത്തിലെ ആരോഗ്യസംരക്ഷണ സംവിധാനം നേരിടുന്ന പ്രതിസന്ധി രണ്ടുമൂന്ന് മാസം മുമ്പ് ഉത്തരേന്ത്യ അനുഭവിച്ചതുമായി താരതമ്യം ചെയ്യാൻ കഴിയില്ലെന്നും അദ്ദേഹം പറഞ്ഞു.