പഴയ സ്വർണം വിറ്റഴിക്കുന്നത്​ തകൃതി; മൂന്നുമാസത്തിനിടെ മലയാളി വിറ്റത്​ 10.79 ടൺ

കോഴിക്കോട്​: സ്വർണം​ റെക്കോർഡ്​ വിലയിലെത്തിയപ്പോൾ പഴയ ആഭരണങ്ങൾ വിറ്റഴിച്ച്​ പണമാക്കി മാറ്റിയതിൽ മുന്നിൽ മലയാളികൾ. മൂന്നുമാസത്തിനിടെ 10.79 ടൺ പഴയ സ്വർണമാണ്​ ജ്വല്ലറികളിൽ തിരിച്ചെത്തിയത്​. 2020 ജൂലൈ, ഓഗസ്റ്റ്, സെപ്റ്റംബർ മാസത്തെ കണക്കുകൾ അവലംബിച്ചാണ്​ വേൾഡ് ഗോൾഡ് കൗൺസിലിൻെറ ഈ വിലയിരുത്തൽ.​ വിലവർധനയും കോവിഡ്​ കാല സാമ്പത്തിക പ്രതിസന്ധിയും ഒരുമിച്ച്​ വന്നതാണ്​ വിൽപന ത്വരിതപ്പെടുത്തിയത്​.

രാജ്യത്ത്​ ആകെ വിറ്റത്​ 41.5 ടൺ പഴയ സ്വർണം

ഇക്കാലയളവിൽ രാജ്യത്ത്​ ആകെ 41.5 ടൺ പഴയ സ്വർണമാണ് ഉരുക്കി ശുദ്ധീകരിച്ച് പുതിയ സ്വർണാഭരണങ്ങൾ നിർമ്മിക്കുന്നതിന് ഉപയോഗിച്ചത്​. 2012ന് ശേഷമുള്ള ഉയർന്ന തോതാണിത്. അതിൽ നാലിലൊന്നും കേരളത്തിൽനിന്നുള്ളതാണ്​. കഴിഞ്ഞ വർഷം ഇതേ പാദത്തിൽ 36.5 ടണ്ണായിരുന്നു വിൽപന. 13.6 ശതമാനം വർധനവാണുണ്ടായത്.

ലോക്​ഡൗണും സാമ്പത്തിക പ്രതിസന്ധിയും കാരണം പുതിയ സ്വർണത്തിൻെറ ഇറക്കുമതി പരിമിതമായിരുന്നു. ആഗോളതലത്തിലും പഴയ സ്വർണത്തിൻെറ പുനരുപയോഗം വർദ്ധിച്ചു. ജൂലൈ - സെപ്റ്റംബർ കാലയളവിൽ ലോകത്ത്​ 376.1 ടൺ പഴയ സ്വർണമാണ് ഉരുക്കി ശുദ്ധീകരിച്ച് പുനരുപയോഗത്തിന് നിർമ്മാണമേഖലയിലെത്തിയത്. ഏപ്രിൽ -​മേയ്​ -ജൂൺ മാസത്തെ അപേക്ഷിച്ച്​ 31ശതമാനം വർധന രേഖപ്പെടുത്തി.

വിലയിടിയുന്നു; വിൽപനയും

വിലയിടിവ്​ തുടങ്ങിയതോടെ പഴയ സ്വർണ വിൽപനയുടെ തോത് കുറഞ്ഞിട്ടുണ്ട്. 2020 ജനുവരി ഒന്നിന്​ പവന്​ 29,000 രൂപയും ഗ്രാമിന്​ 3,625 രൂപയുമായിരുന്നു വില. ആഗസ്റ്റ് ഏഴിന്​ എക്കാലത്തെയും റെ​േക്കാർഡ് വിലയായ 42,000ൽ എത്തി. പിന്നീട്​ തുടർച്ചയായ ചാഞ്ചാട്ടമായിരുന്നു. സെപ്​തംബറിൽ 36,720 രൂപയും ഒക്​ടോബറിൽ 37,120 രൂപയുമാണ്​ പവന്​ രേഖപ്പെടുത്തിയ കുറഞ്ഞ വില. എന്നാൽ, ഈ മാസം നേരിയ തോതിലാണെങ്കിലും വിലയിൽ തുടർച്ചയായ വർധനവാണ്​ കാണിക്കുന്നത്​.

ട്രംപും ബൈഡനും സ്വർണവിലയും

നവംബർ ഒന്നിന്​ 37,680 രൂപയിൽ ആരംഭിച്ച സ്വർണവില അഞ്ചുദിവസം പിന്നിട്ടപ്പോൾ 720 രൂപ വർധിച്ച്​ 38,400 രൂപയായി. യുഎസ് പ്രസിഡൻറ്​ തെരഞ്ഞടുപ്പ് ഫലം സ്വർണ വിലയിൽ നിർണായക സ്വാധീനം ചെലുത്തുമെന്നാണ് വിലയിരുത്തൽ. ട്രംപ് വിജയിച്ചാൽ ട്രോയ്​​ ഔൺസിന്​ 100 ഡോളർ വരെ വർധിച്ചേക്കാമെന്നും ബൈഡനാണെങ്കിൽ ചാഞ്ചാട്ടം തുടരുമെന്നുമാണ്​ നിരീക്ഷണം.