കേരള ശാസ്ത്ര കോൺഗ്രസിന്​ തുടക്കം

തൃശൂർ: അന്ധവിശ്വാസത്തെ ശാസ്ത്രത്തിനു മേൽ പ്രതിഷ്ഠിക്കാൻ ശ്രമം നടക്കുന്നുവെന്നും ഉത്തരവാദിത്തമുള്ള സ്ഥാനങ്ങളിൽ ഇരിക്കുന്നവർതന്നെ അന്ധവിശ്വാസ പ്രചാരകരായി മാറുന്നു​വെന്നും മുഖ്യമന്ത്രി പിണറായി വിജയൻ.

37ാമത് കേരള ശാസ്ത്ര കോൺഗ്രസ് വെള്ളാനിക്കരയിൽ കേരള കാർഷിക സർവകലാശാല ആസ്ഥാനത്ത്​ ഉദ്ഘാടനം ചെയ്യുകയായിരുന്നു മുഖ്യമ​ന്ത്രി. ശാസ്ത്രം പഠിച്ച ശാസ്ത്രജ്ഞരെക്കൊണ്ടുതന്നെ അശാസ്ത്രീയത പ്രചരിപ്പിക്കാനുള്ള വേദിയായി ദേശീയ ശാസ്ത്ര കോൺഗ്രസ് മാറിയെന്നും അ​ദ്ദേഹം കൂട്ടിച്ചേർത്തു.

2040ൽ കേരളത്തിന്​ ആവശ്യമായ വൈദ്യുതിയുടെ 90 ശതമാനവും പുനരുപയോഗ സ്രോതസ്സുകളിൽനിന്നും ഉൽപാദിപ്പിക്കും. 2050ഓടെ സംസ്ഥാനം കാർബൺ ന്യൂട്രൽ ആക്കി മാറ്റുമെന്നും മുഖ്യമന്ത്രി പറഞ്ഞു. ഗവേഷണ ഫലങ്ങൾ പൊതുസമൂഹത്തിലേക്ക് എത്തിക്കാൻ 200 കോടി രൂപ ചെലവിൽ സംസ്ഥാനത്തെ പത്ത് സർവകലാശാലകളിൽ ട്രാൻസലേഷനൽ റിസർച്​ ലാബ്​ സ്ഥാപിക്കുമെന്നും മുഖ്യമന്ത്രി അറിയിച്ചു.

മുഖ്യാതിഥിയായിരുന്ന റവന്യൂ മന്ത്രി കെ. രാജൻ ശാസ്ത്ര കോൺഗ്രസിലെ പ്രബന്ധങ്ങളുടെ സംഗ്രഹം പ്രകാശനം ചെയ്തു. ശാസ്ത്ര-സാങ്കേതിക വകുപ്പ് പ്രിൻസിപ്പൽ സെക്രട്ടറിയുമായ പ്രഫ. കെ.പി. സുധീർ അധ്യക്ഷത വഹിച്ചു. ശാസ്ത്ര കോൺഗ്രസ് ചെയർമാൻ ഡോ.എം.കെ. ജയരാജ്, കാർഷിക സർവകലാശാല വൈസ് ചാൻസലർ ഇൻ-ചാർജ്​ ഡോ.ബി. അശോക്, സംസ്ഥാന സർക്കാറിന്‍റെ ശാസ്ത്ര ഉപദേഷ്ടാവ് എം.സി ദത്തൻ തുടങ്ങിയവർ സംസാരിച്ചു. ശാസ്ത്ര-സാങ്കേതിക-പരിസ്ഥിതി കൗൺസിൽ മെംബർ സെക്രട്ടറി പ്രഫ. എ. സാബു സ്വാഗതവും കേരള വനഗവേഷണ സ്ഥാപന ഡയറക്ടർ ഡോ. കണ്ണൻ സി.എസ്. വാര്യർ നന്ദിയും പറഞ്ഞു.