മേളപ്പെരുക്കത്തിന്‍റെ ചരിത്രം തിരുത്താൻ ​സെന്‍റ്​ ജോസഫിലെ കുട്ടികൾക്ക് മനസില്ല

കൊല്ലം: പന്ത്രണ്ട് വർഷമായുള്ള ചരിത്രം തിരുത്താൻ കോഴിക്കോട് സെന്‍റ്​ ജോസഫ് ഹയർസെക്കൻഡറി സ്കൂളിലെ കുട്ടികൾ ഒരുക്കമല്ലായിരുന്നു. ഇത്തവണയും എ ഗ്രേഡിൽ കുറഞ്ഞതൊന്നിനും തങ്ങളുടെ മനസ്സിൽ ഇടംനൽകാതെയാണ് അവർ എച്ച്.എസ്.എസ് വിഭാഗം ചെണ്ടമേളം വേദിയിലേക്ക് കയറിയത്.

മികച്ച പ്രകടനത്തിനൊടുവിൽ അവരെ തേടി ആഗ്രഹിച്ച സന്തോഷവാർത്ത തന്നെയെത്തി. എ ഗ്രേഡോടെയാണ് ഇത്തവണയും കുട്ടികൾ കോഴിക്കോട്ടേക്ക് മടങ്ങുന്നത്. ജിഷ്ണു, കിരൺ, സംഗീത്, അർജുൻ, സൂര്യ, അഭിഷേക്, അംബരീഷ് എന്നിവരടങ്ങുന്ന കഴിഞ്ഞ വർഷം മത്സരിച്ച അതേ ടീം തന്നെയാണ് കൊല്ലത്ത് നടക്കുന്ന സംസ്ഥാന സ്കൂൾ കലോത്സവത്തിലുമെത്തിയത്. പ്രശസ്ത വാദ്യകലാകാരൻ കണ്ണഞ്ചേരി മണിയാണ് പരിശീലകൻ.