വോട്ടുയന്ത്രം കേടായപ്പോൾ 'രഹസ്യം' പുറത്ത്​; സി.പി.ഐക്കാരൻ വോട്ട്​ ചെയ്തത്​ താമരക്ക്​

കക്കോടി (കോഴിക്കോട്​): വോട്ടുചെയ്യൽ പരമരഹസ്യമാണെങ്കിലും വോട്ടുയന്ത്രം പണിമുടക്കിയാൽ ചിലപ്പോൾ അത്​ പരസ്യമായിപോകും. കക്കോടി പഞ്ചായത്ത്​ പതിനാറാം വാർഡിൽ മാതൃബന്ധു യു.പി സ്​കൂൾ രണ്ടാം ബൂത്തിലെ വോട്ടറുടെ വോട്ടുരേഖപ്പെടുത്തൽ വലിയ തമാശയായിപോയി. പോളിങ്​ തുടങ്ങി മൂന്നാമതായി വോട്ടു ചെയ്​ത്​ വോട്ടർ മടങ്ങിയെങ്കിലും വോട്ടു യന്ത്രം നിലച്ചു.

അടുത്ത വോട്ടർക്ക്​ വോട്ടു ചെയ്യാൻ കഴിയാതെ വോട്ടു യന്ത്രം നിശ്ചലമായി. പ്രിസൈഡിങ്​ ഓഫിസർ യന്ത്രത്തിനരികിലെത്തി. യന്ത്രം നിലച്ചവിവരം പോളിങ്​ ഏജൻറുമാരെ ധരിപ്പിച്ചു. എല്ലാവരും കൂട്ടം കൂടിയപ്പോൾ കണ്ടത്​ താമര ചിഹ്നത്തിൽ ലൈറ്റ്​ തെളിഞ്ഞുനിൽക്കുന്നതാണ്​. വോട്ടു രേഖപ്പെടുത്തി മടങ്ങിയത്​ മുൻ സി.പി.ഐ അംഗവും എ.ഐ.ടി.യു.സി നേതാവുമായിരുന്നു എന്നതാണ്​ സി.പി.എം​ പ്രവർത്തകരായ ബൂത്ത്​ ഏജൻറുമാരെ അമ്പരപ്പിച്ചത്​.

ഉടൻ ടെക്​നീഷ്യനെ വിവരം അറിയിച്ചെങ്കിലും അരമണിക്കൂർ കഴിയും എത്താൻ എന്നറിഞ്ഞതോടെ പ്രിസൈഡിങ്​ ഓഫിസർ യന്ത്രം ഓഫ്​ ചെയ്​ത്​ ബട്ടണിൽ അൽപനേരം കളിച്ചതോടെ​ പ്രവർത്തനക്ഷമമായി പോളിങ്​ തുടരുകയായിരുന്നു.