നഴ്സുമാരുടെയും ജീവനക്കാരുടെയും ശമ്പള വർധന; മിനിമം വേജസ്​ കമ്മിറ്റിയിൽ അംഗീകാരം

തിരുവനന്തപുരം: സ്വകാര്യ ആശുപത്രി നഴ്സുമാരുടെയും ജീവനക്കാരുടെയും ശമ്പള വർധനക്ക്​ മിനിമം വേജസ്​ കമ്മിറ്റിയുടെ അംഗീകാരം. ജൂലൈ 20ന് മുഖ്യമന്ത്രിയുടെ അധ്യക്ഷതയിൽ നടത്തിയ ചർച്ചയിലെ തീരുമാനപ്രകാരമുള്ള ശമ്പള വർധന നടപ്പാക്കുന്നതുമായി ബന്ധപ്പെട്ട് വ്യാഴാഴ്​ച ലേബർ കമീഷണർ കെ. ബിജു യോഗം വിളിച്ചുചേർത്തിരുന്നു. എന്നാൽ, മാനേജ്​മ​​െൻറുകൾ ശിപാർശകളെ എതിർത്തു. ഷിഫ്റ്റ് സമ്പ്രദായം, ശമ്പള വർധന, െട്രയിനിങ്​ സമ്പ്രദായം എന്നിവയിലും അവർ വിയോജിപ്പ് രേഖപ്പെടുത്തി.

വിയോജനക്കുറിപ്പ് അടക്കമുള്ളവ ഉൾപ്പെടുത്തിയ റിപ്പോർട്ടാകും ലേബർ കമീഷണർ തൊഴിൽ സെക്രട്ടറിക്ക് കൈമാറുക. റിപ്പോർട്ട് പരിഗണിച്ചശേഷം തൊഴിൽ വകുപ്പ് ഇനി കരട് വിജ്​ഞാപനം തയാറാക്കും. ആക്ഷേപമുള്ളവർക്ക് അത് അറിയിക്കുന്നതിനുള്ള അവസരവും ലഭിക്കും. വീണ്ടും ചർച്ചകൾക്കുശേഷമായിരിക്കും അന്തിമ വിജ്​ഞാപനം സർക്കാർ ഇറക്കുക. ഒക്ടോബർ ഒന്നുമുതൽ മുൻകാല പ്രാബല്യത്തോടെ ശമ്പളവർധന നടപ്പാക്കണമെന്നാണ് സമിതിയുടെ ശിപാർശ.

നഴ്സുമാരുടെ കുറഞ്ഞ ശമ്പളം 20,000 രൂപയാക്കണം എന്ന സർക്കാർ നിർദേശം മിനിമം വേതനസമിതി അംഗീകരിച്ചു. കിടക്കകളുടെ എണ്ണമനുസരിച്ച് 20,000 രൂപ മുതൽ 35,000 രൂപവരെയാണ് നഴ്സുമാർക്ക്​ ശമ്പളം ലഭിക്കുക. നഴ്സുമാർക്ക്​ പുറമെ ജീവനക്കാർക്ക് 16,000 രൂപ മുതൽ 27,000 രൂപ വരെയും ലഭിക്കും. അതേസമയം, ചർച്ചയിൽ ആശുപത്രി മാനേജുമ​​െൻറുകൾ പൂർണമായും സഹകരിച്ചുവെന്ന് ലേബർ കമീഷണർ കെ. ബിജു പറഞ്ഞു. ചില കാര്യങ്ങളിലുണ്ടായ എതിർപ്പ് അവർ എഴുതിനൽകിയതായും അദ്ദേഹം അറിയിച്ചു. സർക്കാർ ഏകപക്ഷീയമായി ശമ്പളവർധന നടപ്പാക്കിയാൽ അത് വൻ നഷ്​ടമുണ്ടാക്കുമെന്നാണ്​ മാനേജ്​മ​​െൻറുകൾ നിലപാട്​ അറിയിച്ചത്​. ട്രേഡ്​ യൂനിയനുകളെ പ്രതിനിധീകരിച്ച്​ കെ.പി. സഹദേവൻ, എ. മാധവൻ, കെ.ആർ. ഭഗീരഥി, ജാസ്​മിൻഷാ, ലിബിൻ തോമസ്​ എന്നിവർ പ​െങ്കടുത്തു.