കന്യാസ്​ത്രീയുടെ മൊഴിയെടുത്തു; ജലന്ധർ ബിഷപ്പിനെ ചോദ്യം ചെയ്യും

കോട്ടയം: ജലന്ധർ രൂപത ബിഷപ്​ ലൈംഗികമായി പിഡിപ്പിച്ചു​െവന്ന പരാതിയിൽ അന്വേഷണ സംഘം കന്യാസ്​ത്രീയുടെ മൊഴിയെടുത്തു. അന്വേഷണ ഉദ്യോഗസ്ഥനായ വൈക്കം ഡിവൈ.എസ്.പി സുഭാഷിന്‍റെ നേതൃത്വത്തിലുള്ള സംഘമാണ് മൊഴി രേഖപ്പെടുത്തിയത്. മൊഴിയുടെ അടിസ്​ഥാനത്തിൽ ജലന്ധര്‍ ബിഷപ്പ് ഫ്രാങ്കോ മുളക്കലിനെ ചോദ്യം ചെയ്യുമെന്ന്​ ഡിവൈ.എസ്.പി മാധ്യമങ്ങളോട്​ പറഞ്ഞു. ഉടൻ അന്വേഷണ സംഘം ജലന്ധറിലേക്ക്​ തിരിക്കും. കന്യാസ്​ത്രീയുടെ രഹസ്യമൊഴിയെടുക്കുന്നതിനായി കോടതിയിൽ അപേക്ഷ നൽകുമെന്നും അദ്ദേഹം പറഞ്ഞു. 

ജലന്ധര്‍ ബിഷപ്പ് ഫ്രാങ്കോ മുളക്കൽ തന്നെ13 തവണ ​ബലാത്സം​ഗം ചെയ്തുവെന്ന് മൊഴിയിൽ കന്യാസ്ത്രീ ആവർത്തിച്ചു. അഞ്ചുമണിക്കൂർ നീണ്ട മൊഴിയെടുക്കലിൽ പീഡനവിവരം കാട്ടി കർദിനാൾ മാർ ജോർജ്​ ആലഞ്ചേരിക്ക്​ പരാതി നൽകിയിരുന്നതായും ഇവർ വ്യക്​തമാക്കിയിട്ടുണ്ട്​. മാസങ്ങൾ കഴിഞ്ഞിട്ടും സഭതലത്തിൽ നടപടിയുണ്ടാകാത്തതിനാലാണ്​ പൊലീസിനെ സമീപിച്ചതെന്നും 46 കാരിയായ കന്യാസ്​ത്രീ  പറയുന്നു. 

നടപടിയെടുത്തതിലെ വൈരാഗ്യമാണ്​ പീഡനാരോപണത്തിനു പിന്നിലെന്ന ബിഷപ്പി​​​​​​െൻറ പരാതിയിലെ ആരോപണങ്ങളും ഇവർ നിഷേധിച്ചു. തന്നെ മാനസികമായി തളർത്താനും നിയമനടപടികളിലേക്ക്​ പോകാതിരിക്കാനുമായി കെട്ടിച്ചമച്ചതാണ്​ ഇൗ പരാതിയെന്നും​  മൊഴിയിൽ പറയുന്നു. പീഡനത്തെ ഏതിർത്തപ്പോൾ മാനസികമായി തളർത്താൻ ശ്രമമുണ്ടായി. മദർ സൂപ്പീരിയർ പദവിയിൽനിന്ന്​ നീക്കിയത്​ ഇതി​​​​​​െൻറ ഭാഗമായാണ്​. ജലന്ധറിൽ​  ബിഷപ്പിനൊപ്പം പ്രവർത്തിച്ചിരുന്നതായും കന്യാസ്ത്രീ പറഞ്ഞു.

അതിനിടെ, ബിഷപ്പ്​ നൽകിയ പരാതിയിലും പൊലീസ്​ അന്വേഷണം തുടങ്ങിയിട്ടുണ്ട്​. പരാതി ഉന്നയിച്ച കന്യാസ്​ത്രീ അടക്കം നാലുപേരും ഇവരു​െട ബന്ധുക്കളും ചേർന്ന്​ ബിഷപ്പിനെ തട്ടിക്കൊണ്ടുപോകാൻ ശ്രമിച്ചിരുന്നതായാണ്​ പരാതി. 

അതിനിടെ കന്യാസ്ത്രീ നൽകിയ പരാതി പൂഴ്ത്തിയെന്ന് ചൂണ്ടിക്കാട്ടി മേ​ജ​ർ ആ​ർ​ച്ച്​​ ബി​ഷ​പ്​ ക​ർ​ദി​നാ​ൾ മാ​ർ ജോർജ്​ ആ​ല​ഞ്ചേ​രിക്കെതിരെയും െഎ.ജിക്ക്​ പരാതി ലഭിച്ചു. പീഡനം മറച്ചുവെച്ച കർദിനാളിനെതിരെ കേസെടുക്കണമെന്നാവശ്യപ്പെട്ടാണ്​ ​െഎ.ജിക്ക്​ ​ പരാതി നൽകിയത്​. കർദിനാൾ സംഭവം അറിഞ്ഞിട്ടും പൊലീസിൽ അറിയിക്കാതെ ഒത്തു തീർപ്പാക്കാൻ നോക്കി​െയന്ന് ചൂണ്ടിക്കാട്ടി എറണാകുളം സ്വദേശി ജോൺ ജേക്കബാണ്​ പരാതി നൽകിയത്​. 

2014 മെയിൽ ​ജ​ല​ന്ധ​ർ രൂ​പ​ത ബി​ഷ​പ് ഫ്രാ​ങ്കോ മു​ള​ക്ക​ൽ രൂ​പ​ത​ക്ക്​ കീ​ഴി​ലെ കു​റ​വി​ല​ങ്ങാ​ട്ടെ മ​ഠ​ത്തി​ന്​ സ​മീ​പ​ത്തെ ഗെ​സ്​​റ്റ്​ ഹൗ​സി​ൽ വെച്ച്​ തന്നെ പീഡിപ്പിച്ചുവെന്നും പിന്നീട്​ 13 തവണ ഇത്​ തുടർന്നുവെന്നുമാണ് കന്യസ്ത്രീയുടെ​ പരാതി. എതിർക്കാൻ ശ്രമിച്ചപ്പോൾ മാനസികമായും പിഡിപ്പിച്ചുവെന്നും പരാതിയിൽ പറയുന്നു.