ഹ്രസ്വ സന്ദർശനത്തിനെത്തുന്നവർ ഏഴുദിവസത്തിൽ കൂടുതൽ സംസ്​ഥാനത്ത്​ തങ്ങരുത്​

തിരുവനന്തപുരം: ഹ്രസ്വ സന്ദർശനത്തിനായി കേരളത്തിലെത്തുന്നവർക്ക്​ സംസ്​ഥാന സർക്കാർ പുതിയ മാർഗനിർദേശം പുറത്തിറക്കി. ഏഴുദിവസത്തിൽ കൂടുതൽ ഇവർ സംസ്​ഥാനത്ത്​ തങ്ങിയാൽ ബന്ധപ്പെട്ട സ്​ഥാപനം, കമ്പനി തുടങ്ങിയവർക്കെതിരെ കേസെടുക്കും. 

കേരളത്തിലേക്കെത്തുന്ന ഉദ്യോഗസ്​ഥർ, പ്രഫഷനലുകൾ എന്നിവർക്കാണ്​ നേരത്തേ ക്വാറൻറീനിൽ ഇളവ്​ അനുവദിച്ചിരുന്നത്​. പുതിയ ഉത്തരവിൽ വിദ്യാർഥികൾക്കും ഇളവ്​ നൽകിയിട്ടുണ്ട്​. പരീക്ഷ എഴുതാൻ വരുന്നവരും ഏഴുദിവസത്തിൽ കൂടുതൽ സംസ്​ഥാനത്ത്​ തങ്ങാൻ പാടില്ല. പരീക്ഷ തീയതിയുടെ മൂന്നുദിവസം മുമ്പ്​ വരെയും പരീക്ഷതീയതിക്ക്​ മൂന്നുദിവസത്തിന്​ ശേഷവും കേ​രളത്തിൽ തങ്ങാം. ഇവർ മറ്റൊരു സ്​ഥലത്തേക്കും പോകാൻ പാടില്ല. 

ഹ്രസ്വ സന്ദർശനത്തിനെത്തുന്നവർ കോവിഡ്​ ജാഗ്രത പോർട്ടലിൽ രജിസ്​റ്റർ ചെയ്യണം. ജില്ല കലക്​ടർമാർ പാസ്​ അനുവദിക്കും. കേരളത്തിലെത്തുന്നവർ നേരെ താമസസ്​ഥലത്തേക്ക്​ പോക​ണമെന്നും ഉത്തരവിൽ പറയുന്നു.