വിജയരാഘവ​ന്‍റെയും വാസവന്‍റെയും പരാമർശം വേദനജനകം -കേരള മുസ്​ലിം ജമാഅത്ത് കൗൺസിൽ

ആലപ്പുഴ: പാലാ ബിഷപ്പി​െൻറ പരാമർശത്തെക്കാൾ സമുദായത്തെ വേദനിപ്പിച്ചത് ബിഷപ്പിനെ സന്ദർശിച്ചശേഷം മന്ത്രി വാസവൻ നടത്തിയ പ്രസ്താവനയും സി.പി.എം സംസ്ഥാന സെക്രട്ടറി വിജയരാഘവ​െൻറ വാർത്തസമ്മേളനവുമാണെന്ന്​ കേരള മുസ്​ലിം ജമാഅത്ത് കൗൺസിൽ സംസ്ഥാന സെക്രട്ടേറിയറ്റ്.

ബിഷപ്പിനെതിരെ പ്രതികരിക്കുന്നവർ തീവ്രവാദികളാണെന്ന്​ പറയാൻ മന്ത്രിയെ സർക്കാർ ചുമതലപ്പെടുത്തിയിട്ടുണ്ടോയെന്ന്​ വ്യക്തമാക്കണം. ഉന്നത വിദ്യാഭ്യാസം നടത്തുന്ന പെൺകുട്ടികളെ അപമാനിക്കുന്ന രീതിയിൽ സി.പി.എം സമ്മേളനങ്ങളിൽ ചർച്ച ചെയ്യാൻ നൽകിയ ലഘുലേഖകൾ പിൻവലിക്കണമെന്നും യോഗം ആവശ്യപ്പെട്ടു.

സംസ്ഥാന പ്രസിഡൻറ്​ അഡ്വ. എം. താജുദ്ദീൻ ഉദ്ഘാടനം ചെയ്തു. സംസ്ഥാന വർക്കിങ്​ പ്രസിഡൻറ്​ കമാൽ എം. മാക്കിയിൽ അധ്യക്ഷത വഹിച്ചു. സംസ്ഥാന ജനറൽ സെക്രട്ടറി എം.എച്ച്. ഷാജി പത്തനംതിട്ട പ്രമേയം അവതരിപ്പിച്ചു. സംസ്ഥാന ഭാരവാഹികളായ ഡോ. ജഹാംഗീർ തിരുവനന്തപുരം, സി.ഐ പരീത് എറണാകുളം, മരുത അബ്​ദുൽ ലത്തീഫ് മൗലവി, സുബൈർ പറമ്പിൽ, അബ്​ദുൽ ജലീൽ മുസ്​ലിയാർ അഞ്ചൽ, ഇല്യാസ് ജാഫ്ന തൃശൂർ, അഡ്വ. പാച്ചല്ലൂർ നജ്മുദ്ദീൻ, നസീർ പുന്നക്കൽ, നൗഷാദ് വാരിക്കാടൻ ഇടുക്കി, എം.ബി അമീൻഷാ കോട്ടയം എന്നിവർ സംസാരിച്ചു.