കടുവയെ പിടിക്കാൻ എത്തിച്ച കുങ്കി ആന ഇടഞ്ഞു; വനംവകുപ്പിന്​ ഇരട്ടി തലവേദന

വടശ്ശേരിക്കര: നാടിനെ വിറപ്പിച്ച കടുവയെ പിടിക്കാൻ വനംവകുപ്പ് കൊണ്ടുവന്ന കുങ്കി ആന ‘ഇടഞ്ഞു’. അടിയേറ്റ് പാപ്പാൻ പറമ്പിക്കുളം എം. മുരുകൻ​ പരിക്കേറ്റു. പത്തനംതിട്ടയിലെ സ്വകാര്യ ആശുപത്രിയിൽ പ്രവേശിപ്പിച്ചു. ശനിയാഴ്​ച ഉച്ചക്ക്​ 12ഓടെയാണ്​ സംഭവം. 

ആനപ്പുറത്തു കയറാൻ ശ്രമിക്കുന്നതിനിടെ തുമ്പിക്കൈ കൊണ്ട് തട്ടിയിട്ട് കൊമ്പുകൊണ്ട് കോരിയെറിയുകയായിരുന്നെന്ന് ദൃക്സാക്ഷികൾ പറയുന്നു. 

പരിക്ക് ഗുരുതരമല്ലെന്ന്​ വനംവകുപ്പ് അധികൃതർ പറഞ്ഞു. തണ്ണിത്തോട്ടിൽ ടാപ്പിങ്​ തൊഴിലാളിയെ കടുവ ആക്രമിച്ചുകൊലപ്പെടുത്തുകയും നാട്ടിൽ ഭീതി പരത്തുകയും ചെയ്തതോടെയാണ് വയനാട്ടിൽനിന്ന്​ കടുവയെ തിരയാനായി കുങ്കിയാനയെ കോന്നിയിലെത്തിച്ചത്. തുടർന്ന് കടുവ വടശ്ശേരിക്കര പഞ്ചായത്തി​​െൻറ വിവിധ ഭാഗങ്ങളിൽ പ്രത്യക്ഷപ്പെടുകയും മണിയാറിൽ പശുക്കിടാവിനെ കൊലപ്പെടുത്തുകയും ചെയ്തതോടെ കുങ്കിയാനയെ വടശ്ശേരിക്കര ഫോറസ്​റ്റ്​ സ്​റ്റേഷനിലേക്ക് എത്തിക്കുകയായിരുന്നു.

എന്നാൽ, എത്തിച്ചപ്പോൾ മുതൽ മദപ്പാടി​​െൻറ ലക്ഷണങ്ങൾ കാണിച്ചതായും കടുവയെ തിരയാൻ കാര്യക്ഷമമായി ഉപയോഗിക്കാൻ കഴിയാതെവന്നതായും പറയപ്പെടുന്നു. പാപ്പാനെ ആക്രമിച്ച ആനയെ സ്​റ്റേഷൻ പരിസരത്തുനിർത്തി ശരീരം തണുപ്പിക്കാനുള്ള നടപടി ആരംഭിച്ചു. 

കൃത്യമായ പരിചരണവും പരിശീലനവും  ലഭിച്ചിരുന്ന ആനയെ തുടർച്ചയായി ഒരേ സ്ഥലത്ത്​ തളച്ചിരുന്നതാണ് പ്രകോപനമുണ്ടാകാൻ കാരണമെന്നാണ് വനംവകുപ്പി​​െൻറ പ്രാഥമിക വിലയിരുത്തൽ.