സ്പെഷൽ മാര്യേജ് ആക്ട്: 30 ദിവസത്തെ നോട്ടീസ് വേണമോയെന്ന്​ പരിശോധിക്കണം -ഹൈകോടതി

കൊച്ചി: സ്പെഷൽ മാര്യേജ് ആക്ട് പ്രകാരമുള്ള വിവാഹത്തിന് 30 ദിവസത്തെ നോട്ടീസ് കാലാവധി വേണമേയെന്ന്​ നിയമനിർമാതാക്കൾ പരിശോധിക്കണമെന്ന്​ ഹൈകോടതി. നമ്മുടെ ആചാരാനുഷ്​ഠാനങ്ങളിൽപോലും കാതലായ മാറ്റം​ ഉണ്ടായി​​. ചെറുപ്പക്കാർ ഏറെ പേർ വിദേശത്താണ്​. ചെറിയ അവധിക്കാലത്താണ്​ അവർ നാട്ടിലെത്തുന്നത്​. ഇതിനിടെയാണ്​ വിവാഹത്തിനും സമയം കണ്ടെത്തുന്നത്. എന്നാൽ, വിവാഹം കഴിക്കാൻ ദീർഘദിവസത്തെ നോട്ടീസ്​ കാലയളവ്​ തീരാൻ​ കാത്തിരിക്കേണ്ട അവസ്ഥയാണ്​ നിലവിലുള്ളത്​. അതിനാൽ, വിജഞാന, സാ​ങ്കേതിക, സാമൂഹിക തലങ്ങളിൽ ഏറെ മാറ്റങ്ങളുണ്ടായ കാലത്ത്​ ഇത്തരമൊരു കാത്തിരിപ്പിന്‍റെ ആവശ്യമുണ്ടോയെന്ന്​ നിയമനിർമാതാക്കൾ പരിശോധിക്കണമെന്ന്​ ജസ്റ്റിസ്​ വി.ജി. അരുൺ വ്യക്തമാക്കി. 30 ദിവസത്തെ നോട്ടീസ് കാലയളവിൽ ഇളവുതേടി വിദേശത്തുനിന്ന് അവധിക്കെത്തിയ എറണാകുളം സ്വദേശികളായ ബിജി പോൾ, ജോയ്​സി ജോസഫ്​ എന്നിവർ നൽകിയ ഹരജിയിലാണ്​ ഉത്തരവ്​.

സ്പെഷൽ മാര്യേജ് ആക്ട് പ്രകാരം വിവാഹത്തിനായി നോട്ടീസ് നൽകുന്നതിന് മുമ്പ്​ ബന്ധപ്പെട്ട കക്ഷികളിലൊരാൾ വിവാഹ ഓഫിസറുടെ പരിധിയിൽ 30 ദിവസം താമസിച്ചിരിക്കണം. ഇതിനുശേഷം വീണ്ടും 30 ദിവസം കൂടി കാത്തിട്ട്​ വേണം വിവാഹം രജിസ്റ്റർ ചെയ്യാൻ. ഈ വ്യവസ്ഥ ഭരണഘടന വിരുദ്ധമാണെന്നും നിർദേശരൂപത്തിലുള്ള വ്യവസ്ഥകൾ പാലിക്കണമെന്ന്​ നിർബന്ധമില്ലാത്തതാണെന്നും ഹരജിക്കാർ ചൂണ്ടിക്കാട്ടി. വിദേശത്തേക്ക്​ മടങ്ങേണ്ടതിനാൽ 30 ദിവസത്തെ നോട്ടീസ് കാലയളവിൽ ഇളവ് നൽകി ഇടക്കാല ഉത്തരവ് പുറപ്പെടുവിക്കണമെന്ന്​ ഹരജിക്കാർ ആവശ്യപ്പെട്ടു.

എന്നാൽ, ഇത്തരമൊരു ഇടക്കാല ഉത്തരവ് നിയമപരമായ വ്യവസ്ഥയെ സ്റ്റേ ചെയ്തതിന് തുല്യമായിരിക്കുമെന്ന കേന്ദ്രസർക്കാറിന്‍റെ വാദം പരിഗണിച്ച കോടതി തള്ളി. എതിർപ്പുകളുണ്ടെങ്കിൽ അറിയിക്കാൻ സമയം അനുവദിക്കാനാണ്​ 30 ദിവസത്തെ നോട്ടീസ്​. അരനൂറ്റാണ്ടായി നിലനിൽക്കുകയും നടപ്പാക്കുകയും ചെയ്യുന്ന നിയമ വ്യവസ്ഥയാണിത്​. ഇത്​ ലംഘിച്ച്​ ഇടക്കാല ഉത്തരവ്​ നൽകരുതെന്നായിരുന്നു കേന്ദ്രസർക്കാറിന്‍റെ വാദം.

വ്യവസ്ഥ ഭരണഘടന വിരുദ്ധമെന്ന്​ ബോധ്യമാകാത്തതിനാൽ ഇടക്കാല ഉത്തരവിടാനാവില്ലെന്ന്​ കോടതിയും വ്യക്തമാക്കി. വ്യവസ്ഥകൾ നിയമപരമെന്ന കോടതി ഉത്തരവുകൾ അവഗണിക്കാനാവില്ലെന്ന്​ ചൂണ്ടിക്കാട്ടിയ കോടതി ഇടക്കാല ആവശ്യം തള്ളുകയായിരുന്നു. കേന്ദ്ര-സംസ്ഥാന സർക്കാറുകളോട് സത്യവാങ്മൂലം ഫയൽ ചെയ്യാൻ നിർദേശിച്ച കോടതി ഹരജി ഒരു മാസത്തിനുശേഷം പരിഗണിക്കാൻ മാറ്റി.