അണക്കെട്ടുകൾ സുരക്ഷിതം: രക്ഷാപ്രവർത്തനങ്ങൾ ഉൗർജിതം- മുഖ്യമന്ത്രി

തിരുവനന്തപുരം: സംസ്ഥാനത്ത്​ കനത്ത മഴ തുടരുന്ന സാഹചര്യത്തിൽ വിവിധ സേനകളെ ഏകോപിപ്പിച്ച്​ രക്ഷാപ്രവർത്തനം ഉൗർജിതമാക്കിയതായി മുഖ്യമന്ത്രി പിണറായി വിജയൻ. മഴ തുടരുന്നതിനാൽ ജനം കൂടുതൽ ജാഗ്രത പുലർത്തണം.  ഒറ്റപ്പെട്ട്​ കഴിയുന്നവരെ രക്ഷപ്പെടുത്തുന്നതിനുവേണ്ടിയുള്ള ശ്രമങ്ങൾ നടന്നുകൊണ്ടിരിക്കയാണ്​. കൂടുതല്‍ രക്ഷാപ്രവര്‍ത്തന സാമഗ്രികള്‍ കേന്ദ്രത്തോട് ആവശ്യപ്പെട്ടിട്ടുണ്ട്. രക്ഷാപ്രവര്‍ത്തനത്തിന് നാളെ മുതല്‍ കൂടുതല്‍ ഹെലികോപ്ടറുകള്‍ എത്തും.
23 ഹെലികോപ്​ടറുകൾ നാളെ പ്രവർത്തന സജ്ജമാകും. 250 ബോട്ടുകൾ രക്ഷാപ്രവർത്തനത്തിലുണ്ട്​.  ആലുവ, ചെങ്ങന്നൂർ, റാന്നി, ആറമ്മുള, കോഴഞ്ചേരി തുടങ്ങിയ ഇടങ്ങളിലേക്ക്​ കൂടുതൽ ബോട്ടുകൾ അയക്കും. നാളെ പകലോടെ എല്ലാവരെയും സുരക്ഷിതരാക്കുമെന്നും മുഖ്യമന്ത്രി വാർത്താസമ്മേളനത്തിൽ അറിയിച്ചു. അവലോകന യോഗത്തിനു ശേഷം മാധ്യമങ്ങളോട്​ സംസാരിക്കുകയായിരുന്നു അദ്ദേഹം. 

വ്യാജവാർത്ത പ്രചരിപ്പിക്കുന്നവർ അതിൽ നിന്നും പിന്തിരിയണം. ഇവർ​െക്കതിരെ കർശന നടപടി സ്വീകരിക്കും. മുല്ലപ്പെരിയാർ ഡാമിൽ വിള്ളൽ വീണെന്ന വാർത്ത തെറ്റാണ്​. കേരളത്തിലെ എല്ലാ അണക്കെട്ടുകളും സുരക്ഷിതമാണെന്നും മുഖ്യമന്ത്രി പറഞ്ഞു. 

മഴനാളെയും തുടരുമെന്നാണ്​ മുന്നറിയിപ്പ്.​ നെടുമ്പാശ്ശേരി വിമാനത്താവളം അടച്ചിടും. കൊച്ചിയിലെ നേവൽ ബേസിലും വിമാനമിറങ്ങുന്നതിൽ ​സുരക്ഷാ സംബന്ധമായ പ്രശ്​നമുള്ളതിനാൽ വിമാനങ്ങൾ കരിപ്പൂർ വിമാനത്താവളത്തിലും തിരുവനന്തപുരത്തും ഇറങ്ങുന്നതിനുള്ള സജീകരണങ്ങൾ ഒരുക്കിയിട്ടുണ്ട്​. 

പത്തനംതിട്ട, ആലപ്പുഴ, തൃശൂർ, കൊച്ചി എന്നിവടങ്ങളിൽ രക്ഷാപ്രവർത്തനത്തിന്​ ഹെലികോപ്​ടറുകൾ ഉപയോഗിക്കും. രക്ഷാപ്രവർത്തനത്തിനായി 10 നേവി യൂനിറ്റുകൾ വേണമെന്ന്​ കേന്ദ്രത്തോട്​ ആവശ്യപ്പെട്ടിട്ടുണ്ട്​. ദേശീയ ദുരിത നിവാരണസേനയുടെ അഞ്ച്​ യൂനിറ്റുകളും കൂടുതൽ ഡിങ്കികളും ബോട്ടുകളും ആവശ്യപ്പെട്ടിട്ടുണ്ട്​. 2000 ത്തോളം ലൈഫ്​ ജാക്കറ്റുകളും പവർലൈറ്റുകളും റെയിൻകോട്ടുകളും മറ്റ്​ ജീവൻ സുരക്ഷാ ഉപകരണങ്ങളും നൽകാൻ  ആവശ്യപ്പെട്ടിട്ടു​ണ്ട്​.  

കുത്തൊഴുക്കുള്ള ഇടങ്ങളിൽ ഹെലികോപ്​ടർ വഴി രക്ഷാപ്രവർത്തനം നടത്തും. തമിഴ്‌നാട് ഫയര്‍ഫോഴ്‌സ് ബോട്ടുകളും സ്വകാര്യ ബോട്ടുകളും ഉപയോഗിക്കും. വീടുകളുടെ രണ്ടാം നിലയിലും മറ്റും ഒറ്റപ്പെട്ട്​ കഴിയുന്നവർക്ക്​ ഭക്ഷണവും കുടിവെള്ളവും എത്തിക്കാനും  ശ്രമിക്കുന്നുണ്ട്​. രക്ഷാപ്രവർത്തനങ്ങൾ തദ്ദേശ സ്വയംഭരണ സ്ഥാപനങ്ങൾ സഹായ സന്നദ്ധതയുള്ളവരുമായി സഹകരിച്ച്​  ചെയ്യേണ്ടതാണ്​. തദ്ദേശ സ്വയംഭരണ സ്ഥാപനങ്ങൾക്ക്​ ചെലവാകുന്ന തുക സർക്കാർ വകവെച്ചു നൽകുമെന്നും മുഖ്യമ​ന്ത്രി പറഞ്ഞു. 

രക്ഷാപ്രവര്‍ത്തനങ്ങളില്‍ പോലീസും ഫയര്‍ഫോഴ്‌സും നിര്‍ണായക പങ്കാണ് വഹിക്കുന്നത്. ദുരിതബാധിത പ്രദേശങ്ങളില്‍ ജലവകുപ്പ് ആവശ്യത്തിന് കുടിവെള്ളമെത്തിക്കും. വയനാട്ടിലെ പ്രളയബാധിതര്‍ക്ക് സൗജന്യ റേഷന്‍ അനുവദിക്കും. ദുരിതാശ്വാസക്യാമ്പുകളില്‍ ഒന്നരലക്ഷത്തോളം പേരാണുള്ളത്​. എറണാകുളം മേഖലയില്‍ നിന്ന് 2500 പേരെയും പത്തനംതിട്ട മേഖലയില്‍ നിന്ന് 580 പേരെയും ഇതുവരെ രക്ഷപെടുത്തിയതായും മുഖ്യമന്ത്രി അറിയിച്ചു. 

യഥാർഥത്തിൽ കേരളത്തെ പുനർ നിർമിക്കേണ്ടിവരും. വലിയ തോതിലുള്ള ഫണ്ട്​ വേണം. അതിനാൽ  വിദേശമദ്യത്തി​​​​െൻറ എക്​സൈസ്​ തീരുവ വർധിപ്പിക്കുമെന്നും ആ തുക  ദുരിതാശ്വാസ പ്രവർത്തനത്തിന്​ ഉപയോഗിക്കുമെന്നും അദ്ദേഹം പറഞ്ഞു.