ഭാര്യയെ മർദ്ദിച്ചെന്ന പരാതിയിൽ യുവാവിനെ അറസ്റ്റ് ചെയ്​തു

കൊടുങ്ങല്ലൂർ: ഭാര്യയെ മർദിച്ചെന്ന പരാതിയിൽ ഭർത്താവിനെ പൊലീസ് അറസ്റ്റ് ചെയ്തു. എറിയാട് മേനോൻ ബസാർ വാഴക്കാലയിൽ ഷാജി (34)നെയാണ് കൊടുങ്ങല്ലൂർ സി.ഐ ബ്രിജുകുമാറും സംഘവും അറസ്റ്റ് ചെയ്തത്. ഭാര്യയുടെ പരാതിയിലാണ് അറസ്റ്റ്. ഭർത്താവിന്റെ മർദ്ദനം പതിവായതിനെ തുടർന്ന് ഭാര്യ സ്വന്തം വീട്ടിലാണ് താമസം.

കഴിഞ്ഞ ദിവസം യു.ബസാറിലുള്ള ബന്ധുവീട്ടിൽ ഭാര്യയുണ്ടെന്നറിഞ്ഞ്​ അവിടെയെത്തിയ ഷാജി വീണ്ടും മർദ്ദിക്കുകയായിരുന്നു. മരപ്പലക കൊണ്ടുള്ള അടിയേറ്റ് ഭാര്യയുടെ കൈക്ക് ചതവ് പറ്റി. തുടർന്ന് കൊടുങ്ങല്ലൂർ പൊലീസിൽ പരാതി നൽകുകയായിരുന്നു. പ്രതിക്കെതിരെ ഗാർഹിക പീഡന നിരോധന നിയമപ്രകാരമാണ് കേസെടുത്തിട്ടുള്ളത്. പ്രതിയെ കോടതി റിമാൻഡ്​ ചെയ്തു.