കെനിയ വാഹനാപകടം: അമ്മയുടെ വിയോഗവാർത്തയിൽ നടുങ്ങി മകൻ ഡോ. ജുവൽ

കൊച്ചി: അപ്രതീക്ഷിതമായെത്തിയ ആ വിയോഗവാർത്തയുടെ നടുക്കത്തിലാണ്​ മകൻ ജുവൽ. കെനിയയിൽ വാഹനാപകടത്തിൽ ജീവൻ നഷ്ടമായ ഗീത സോജി ഐസകിന്‍റെ മകൻ ഡോ. ജുവലിന്​ ആ വാർത്ത ഇപ്പോഴും ഉൾക്കൊള്ളാൻ കഴിഞ്ഞിട്ടില്ല. ബസ്​ നിയന്ത്രണം വിട്ട് മറിഞ്ഞാണ്​ അപകടമെന്ന്​ പിതാവും സഹോദരനും പറഞ്ഞതായി കൊച്ചിയിലെ ഫ്ലാറ്റിൽ താമസിക്കുന്ന ജുവൽ മാധ്യമപ്രവർത്തകരോട്​ പറഞ്ഞു.

സംഭവ സ്ഥലത്ത് തന്നെ അമ്മക്ക്​ ജീവൻ നഷ്ടമായി. പിതാവും സഹോദരനും പരിക്കേറ്റ്​ ആശുപത്രിയിലാണ്. സഹോദരന് ശസ്ത്രക്രിയ ആവശ്യമാണെന്നാണ് അറിയിച്ചത്​. തങ്ങൾ വളർന്നത്​ ഖത്തറിലാണ്​. അവിടെ നിന്ന്​ ഒരാഴ്ചത്തെ യാത്രക്കാണ് അവർ പുറപ്പെട്ടത്. എംബസിയിൽ നിന്നാണ് കൂടുതൽ വിവരങ്ങൾ ലഭിച്ചത്. പിതാവിന്‍റെ സഹോദരൻ എമർജൻസി വിസയെടുത്ത് കെനിയയിലേക്ക്​ തിരിച്ചിട്ടുണ്ടെന്നും ജുവൽ പറഞ്ഞു.

ജൂൺ ആറിന് ബലിപെരുന്നാൾ ദിനത്തിൽ ഖത്തറിൽ നിന്നും കെനിയയിലേക്ക് പോയ 28 പേർ അടങ്ങിയ വിനോദയാത്രാസംഘമാണ് മധ്യ കെനിയയിലെ ന്യാൻഡറുവ കൗണ്ടിയിൽ അപകടത്തിൽപെട്ടത്. തിങ്കളാഴ്​ച പ്രാദേശിക സമയം വൈകുന്നേരം നാലു മണിയോടെയായിരുന്നു അപകടം. നയ്​റോബിയിൽ നിന്നും 200ഓളം കിലോമീറ്റർ ദൂരെയാണ്​ സംഭവം​.

കനത്ത മഴയിൽ വിനോദ സഞ്ചാരികളുടെ ബസ് ന്യാൻഡറുവ കൗണ്ടിയിലെ ഗിചാകയിൽ ഒൽജോറോ-നകുരു ​ഹൈ​വേയിൽ നിയന്ത്രണംവിട്ട് തെന്നിനീങ്ങി താഴ്​ചയിലേക്ക്​ മറിയുകയായിരുന്നുവെന്നും പ്രാദേശിക മാധ്യമങ്ങൾ റിപ്പോർട്ട്​ ചെയ്​തു. ബസിന്‍റെ മേൽകൂരകൾ തകർന്ന നിലയിലാണ്​ താഴെ പതിച്ചത്​.

തിങ്കളാഴ്ച ഉച്ചകഴിഞ്ഞ് നകുരുവിൽ നിന്ന് ലൈക്കിപിയ പ്രദേശത്തെ ന്യാഹുരു തോംസൺ വെള്ളച്ചാട്ടത്തിലേക്ക് വിനോദ സഞ്ചാരികളെ കൊണ്ടു പോവുകയായിരുന്നു ബസ്. ഖത്തറിൽ നിന്നും പെരുന്നാൾ അവധി ആഘോഷിക്കാൻ ജൂൺ ആറിനാണ് വിനോദയാത്രാ സംഘം ട്രാവൽ ഏജൻസിക്ക് കീഴിൽ യാത്രതിരിച്ചത്. ​ബുധനാഴ്​ച ദോഹയിൽ തിരിച്ചെത്തേണ്ട സംഘമാണ് അപകടത്തിൽപ്പെട്ടത്.