വിമാനത്താവളത്തിൽ നിന്ന്​ മുങ്ങി പിതാവിന്‍റെ സംസ്കാരചടങ്ങിൽ പങ്കെടുത്തയാൾക്കെതിരെ കേസ്​

ഇരിങ്ങാലക്കുട: വിമാനത്താവളത്തിൽനിന്ന്​ മുങ്ങി പിതാവി​​െൻറ സംസ്കാരചടങ്ങിൽ പങ്കെടുത്തതിന്​ പ്രവാസിക്കെതിരെ പൊലീസ്​ കേസെടുത്തു​. കാറളം സ്വദേശിക്കെതിരെയാണ്​ പകർച്ചവ്യാധി തടയൽ നിയമം ഉൾപ്പെടെ വകുപ്പുകൾ ചേർത്ത്​ കാട്ടൂർ പൊലീസ് കേസെടുത്തത്​. അബൂദബിയിൽ നിന്ന് നാട്ടിൽ എത്തിയ ഇയാൾ ക്വാറൻറീനിൽ പോകാതെ മുങ്ങുകയായിരുന്നു.

ജില്ല ഭരണകൂടത്തെയും പഞ്ചായത്തിനെയും ആരോഗ്യ വിഭാഗത്തെയും അറിയിക്കാതെയാണ്​ വീട്ടിലെത്തി സംസ്കാരചടങ്ങിൽ പങ്കെടുത്തത്​. ഇത് സംബന്ധിച്ച കാറളം പഞ്ചായത്ത് സെക്രട്ടറിയുടെ പരാതിയിലാണ് നടപടി. സംഭവത്തെ തുടർന്ന് ഇയാളെയും കുടുംബാംഗങ്ങളെയും ആരോഗ്യ വകുപ്പ് വീട്ടിൽ നിരീക്ഷണത്തിലാക്കിയിട്ടുണ്ട്. 

നിരീക്ഷണ കാലാവധി കഴിഞ്ഞാൽ അറസ്​റ്റ്​ ഉൾപ്പെടെയുള്ള നടപടികൾ സ്വീകരിക്കുമെന്ന് പൊലീസ് അറിയിച്ചു.