ഉത്സവത്തിനിടെ കതിന പൊട്ടിത്തെറിച്ച് നാലുപേർക്ക് പരിക്ക്

തൃശൂർ: പാലക്കൽ ഭഗവതി ക്ഷേത്രത്തിലെ ഉത്സവത്തിനിടെ കതിന പൊട്ടിത്തെറിച്ച് നാലുപേർക്ക് പരിക്കേറ്റു. വഴിപാടായി നൽകുന്ന കതിന പൊട്ടിക്കുന്നതിനിടെയാണ് അപകടം. വെടിക്കെട്ട് ജോലിക്കാർക്കാണ് പരിക്കേറ്റത്.

വരവൂർ സ്വദേശികളായ ഷാൻജിത്ത് (27), രാജേഷ് (37), ശ്യാംലാൽ (28), ശബരി (18) എന്നിവർക്കാണ് പരിക്കേറ്റത്. നാലുപേരെയും തൃശൂർ മെഡിക്കൽ കോളജ് ആശുപത്രിയിൽ പ്രവേശിപ്പിച്ചു. വെയിലിന്റെ കാഠിന്യം കാരണം കതിന പൊട്ടിത്തെറിക്കുകയായിരുന്നു. പരിക്ക് ഗുരുതരമല്ലെന്നും പൂരം സാധാരണ രീതിയിൽ നടക്കുമെന്നും ഭാരവാഹികൾ പറഞ്ഞു.