കതിരൂർ ​മനോജ്​ വധം: പി. ജയരാജൻ അടക്കം 25 പ്രതികൾ കോടതിയിൽ ഹാജരായി

കൊച്ചി: ആര്‍.എസ്.എസ് നേതാവ് കതിരൂര്‍ മനോജിനെ കൊലപ്പെടുത്തിയ കേസില്‍ സി.പി.എം കണ്ണൂര്‍ ജില്ല സെക്രട്ടറി പി. ജയരാജന്‍ അടക്കം കേസിലുൾപ്പെട്ട 25 പ്രതികൾ കോടതിയിൽ ഹാജരായി. കുറ്റപത്രം സമർപ്പിക്കപ്പെട്ടതിനെത്തുടർന്ന്​ കോടതി പുറപ്പെടുവിച്ച സമൻസി​​െൻറ അടിസ്​ഥാനത്തിലാണ്​ ജയരാജൻ അടക്കം ജാമ്യത്തിൽ കഴിയുന്ന 10 പ്രതികൾ ഹാജരായത്​. മറ്റ്​ 15 പ്രതികൾ ജുഡീഷ്യൽ കസ്​റ്റഡിയിലായതിനാൽ പൊലീസാണ്​ ഇവരെ കോടതിയിൽ ഹാജരാക്കിയത്​. 

ജുഡീഷ്യൽ കസ്​റ്റഡിയിലുള്ള പ്രതികളുടെ റിമാൻഡ്​​ നീട്ടിയ എറണാകുളം പ്രത്യേക സി.ബി.​െഎ കോടതി ജയരാജൻ അടക്കമുള്ള 10 പേരുടെ ജാമ്യം നീട്ടി. 50,000 രൂപക്കും തുല്യതുകക്കുള്ള രണ്ടാൾ ഉറപ്പിന്മേലുമാണ്​ ഇവരുടെ ജാമ്യം നീട്ടിനൽകിയത്​. സി.പി.എം പയ്യന്നൂര്‍ ഏരിയ സെക്രട്ടറി മധുസൂദനന്‍, തലശ്ശേരി ഈസ്​റ്റ്​ കതിരൂര്‍ രാജു എന്ന രാജേഷ്, തലശ്ശേരി മീത്തല്‍ വീട്ടില്‍ മഹേഷ്, ഈസ്​റ്റ്​ കതിരൂര്‍ സുനൂട്ടി എന്ന സുനില്‍ കുമാര്‍, കതിരൂര്‍ ചുണ്ടകപ്പോയില്‍ വി.പി. സജിലേഷ്, കതിരൂർ സ്വദേശികളായ പ്രകാശൻ, കൃഷ്​ണൻ, എ. രാമചന്ദ്രൻ, സിറാജ്​ എന്നിവരാണ് ജാമ്യം ലഭിച്ച മറ്റുള്ളവർ. എ.എൻ. ഷംസീർ എം.എൽ.എക്കും കാരായി രാജനുമൊപ്പം രാവിലെ 10.45 ഒാടെയാണ്​ ജയരാജൻ കോടതിയിൽ ഹാജരായത്​. കേസ്​ വീണ്ടും ജനുവരി 18ന്​ പരിഗണിക്കും. മുഖ്യപ്രതി വിക്രമൻ അടക്കമുള്ളവരാണ്​ ജുഡീഷ്യൽ കസ്​റ്റഡിയിലുള്ളത്​. 

2014 സെപ്റ്റംബര്‍ ഒന്നിനാണ് മാരുതി ഒമ്നി വാനില്‍ സഞ്ചരിക്കുകയായിരുന്ന ആര്‍.എസ്.എസ് ജില്ല ശാരീരിക് ശിക്ഷക് കിഴ​േക്ക കതിരൂരിലെ ഇളന്തോട്ടത്തില്‍ കെ. മനോജ് കുമാര്‍ (42) കൊല ചെയ്യപ്പെട്ടത്. പി. ജയരാജന് രാഷ്​ട്രീയമായും വ്യക്തിപരമായും മനോജിനോടുള്ള അടങ്ങാത്ത പകയാണ് ഭീകരാന്തരീക്ഷം സൃഷ്​ടിച്ച് കൊലചെയ്യാൻ ആസൂത്രണം നടത്തുന്നതിലേക്ക് നയിച്ചതെന്നാണ്​ സി.ബി.​െഎയുടെ ആരോപണം. ആദ്യം 15 പേർക്കെതിരെ കുറ്റപത്രം നൽകിയ സി.ബി.​െഎ രണ്ടുമാസം മുമ്പാണ്​ ജയരാജൻ അടക്കം ആറുപേർക്കെതിരെ ഗൂഢാലോചനക്കുറ്റത്തിന്​ യു.എ.പി.എ അടക്കമുള്ള വകുപ്പുകൾ ചുമത്തി കുറ്റപത്രം നൽകിയത്​.