കാസര്‍കോട്ട് ബി.ജെ.പി ഹര്‍ത്താല്‍ അക്രമാസക്​തം

കാസര്‍കോട്: ഹർത്താലിനോടനുബന്ധിച്ച്​ നഗരത്തിൽ ബി.ജെ.പി നടത്തിയ പ്രകടനം അക്രമാസക്​തമായി. തുടർന്ന്​ പൊലീസും ബി.ജെ.പി പ്രവർത്തകരും ഏറ്റുമുട്ടി. പ്രവർത്തകരെ പിരിച്ചു വിടാൻ പൊലീസ്​ കണ്ണീർ വാതകം പ്രയോഗിച്ചു.

മാർച്ചിനിടെ സി.പി.എം ഓഫീസുകള്‍ക്ക് നേരെയും സഹകരണ ബാങ്കുകള്‍ക്ക് നേരെയും കല്ലേറുണ്ടായി. പലയിടത്തും സി.പി.എം കൊടികളും പാർട്ടി സ്​ഥാപനങ്ങളും നശിപ്പിക്കുകയും ചെയ്തു. ദേശാഭിമാനി ഓഫീസിനു നേരെയും ആക്രമണത്തിന് ശ്രമമുണ്ടായതോടെയാണ്​ പോലീസ് പ്രകടനം തടഞ്ഞത്​. ഇത് ബി.ജെ.പി അണികളെ കൂടുതല്‍ അക്രമാസക്തരാക്കി. തുടര്‍ന്ന്​ പോലീസ് കണ്ണീര്‍വാതകം പ്രയോഗിക്കുകയായിരുന്നു.

തിങ്കളാഴ്ച ജില്ലയിലെ സി.പി.എം ശക്തികേന്ദ്രമായ ചീമേനിയിലേക്ക് ചെറുവത്തൂരില്‍ നിന്നും ബി.ജെ.പി സ്വാതന്ത്ര്യ സംരക്ഷണ പദയാത്ര സംഘടിപ്പിച്ചിരുന്നു. യാത്രക്കുനേരെ ചെറുവത്തൂരില്‍ നടന്ന ആക്രമിച്ചതിലും തങ്ങളുടെ പ്രവർത്തകരെ അന്യായമായി പൊലീസ്​ കസ്​റ്റഡിയിലെടുത്തതിലും പ്രതിഷേധിച്ചാണ്​ ബി.ജെ.പി ഹര്‍ത്താലിന്  ആഹ്വാനം ചെയ്തത്​.