പുഴയിൽവീണ്​ യുവാവിനെ കാണാതായി

ബളാംതോട്: കോഴിക്കട മാലിന്യം പുഴയിലേക്ക് തള്ളുന്നതിനിടയിൽ അബദ്ധത്തിൽ പുഴയിൽവീണ് യുവാവിനെ കാണാതായി. ബളാംതോട് ചാമുണ്ഡിക്കുന്നിലെ തിമുനായ്ക് -കാവേരി ദമ്പതികളുടെ മകൻ ജയകുമാറിനെയാണ് (32) കാണാതായത്.

കഴിഞ്ഞ ദിവസം രാത്രി 11 മണിയോടെയാണ്​, സുഹൃത്തും കോഴിക്കട ഉടമയുമായ ഡിപിൻ, സഹോദരൻ വിപിൻ എന്നിവർക്കൊപ്പം ജയകുമാർ കാറിൽ കോഴിക്കടയിലെ അവശിഷ്​ടങ്ങൾ കളയാൻ ബളാംതോട്ടെ ചെക്ഡാം കം ബ്രിഡ്ജിലെത്തിയത്. ഇവിടെനിന്ന്​ വീപ്പയിലെ കോഴിമാലിന്യം പുഴയിലേക്ക് തള്ളുന്നതിനിടയിൽ ജയകുമാറും അബദ്ധത്തിൽ പുഴയിലേക്ക് വീഴുകയായിരുന്നു.

ഈ സമയം കാറിൽ ഇരിക്കുകയായിരുന്നു ഡിപിനും വിപിനും. ഇവർ ജയകുമാറിനെ രക്ഷിക്കാൻ ശ്രമിച്ചെങ്കിലും സാധിച്ചില്ല. ഇവരുടെ നിലവിളി കേട്ടെത്തിയ നാട്ടുകാർ തിരച്ചിൽ നടത്തിയെങ്കിലും കണ്ടെത്താനായില്ല.