കേന്ദ്ര വാഴ്​സിറ്റി വകുപ്പു തലവ​നെതിരെ അന്വേഷണത്തിനു വനിത കമീഷൻ നിർദേശം

കാസർകോട്​: കേന്ദ്ര സർവകലാശാല മുൻ പി.വി.സിയും നിലവിൽ ഡീനും ഇൻറർനാഷനൽ റിലേഷൻസ്​ ആൻഡ്​ പൊളിറ്റിക്​സ്​ വകുപ്പു​ മേധാവിയുമായ പ്രഫസർ ഡോ. കെ. ജയപ്രസാദിനെതി​െര അന്വേഷണം നടത്താൻ സംസ്​ഥാന വനിത കമീഷൻ നിർദേശം. അതേ വകുപ്പിലെ അസി. പ്രഫസർ ഡോ. ഉമാപുരുഷോത്തമൻ നൽകിയ പരാതിയിലാണ്​ അന്വേഷണം നടത്തുന്നതിന്​ വൈസ്​ ചാൻസലർ ഡോ. വെങ്കിടേശ്വരലുവിനോട്​ നിർദേശിച്ചിരിക്കുന്നത്​. കേന്ദ്ര വാഴ്​സിറ്റിയിൽ ജോലി ചെയ്യുന്നതിന്​ ജീവനു ഭീഷണിയു​ണ്ടെന്ന്​ ഉമാപുരുഷോത്തമൻ കമീഷനു നൽകിയ പരാതിയിൽ പറഞ്ഞു.

2021 ഫെബ്രുവരി 12ന്​ വാഴ്​സിറ്റിയിൽ നടന്ന ഫാക്കൽറ്റി യോഗത്തിലാണ്​ പരാതിക്കിടയാക്കിയ സംഭവമെന്ന്​ പരാതിയിൽ പറയുന്നു. വകുപ്പുതലവനായ ഡോ. കെ. ജയപ്രസാദ്,​ എം.എ പ്രവേശനത്തിനു ആവിഷ്​കരിച്ച മാനദണ്ഡം മാറ്റണമെന്ന്​ മുൻ വകുപ്പു തലവൻ പ്രഫ. എം.എസ്‌. ജോൺ, ഡോ. ഉമ പുരുഷോത്തമൻ, ഡോ. ഗിൽബർട്ട്‌ സെബാസ്‌റ്റ്യൻ എന്നിവർ ആവശ്യപ്പെട്ടു. സയൻസ്‌, കോമേഴ്‌സ്‌, ഹ്യൂമാനിറ്റീസ്‌ പശ്ചാത്തലമുള്ള വിദ്യാർഥികൾക്ക്‌ ഇൻറർനാഷനൽ റിലേഷൻസ്‌ ആൻഡ്‌ പൊളിറ്റിക്​സിൽ പ്രവേശനം നൽകേണ്ടതില്ലെന്ന ഡോ. ജയപ്രസാദി​‍െൻറ നിലപാടിനെ മൂന്നുപേരും എതിർത്തു. ഇത്തരം മാനദണ്ഡം ആവിഷ്​കരിക്കുകവഴി വലിയ വിഭാഗം വിദ്യാർഥികൾക്ക് ഈ വിഷയം പ്രാപ്യമല്ലാതാകുമെന്ന്​ ഇവർ അഭിപ്രായപ്പെട്ടു.

അതോടെ നിയന്ത്രണംവിട്ട ജയപ്രസാദ്‌ വകുപ്പിൽ വിഭാഗീയതയുണ്ടാക്കിയാൽ നേരിട്ട്​ ആക്‌ഷൻ എടുക്കുമെന്നും കായികമായും ശാരീരികമായും നേരിടുമെന്നും ഭീഷണിമുഴക്കിയെന്ന്​ പരാതിയിൽ പറയുന്നു. ത​െൻറ വാദം അംഗീകരിച്ചി​ല്ലെങ്കിൽ 'ലോറി കയറിയും ആൾക്കാർ മരിക്കു'മെന്നാണ്​ ജയപ്രസാദ്​ ഭീഷണി മുഴക്കിയത്​. ഈ ഭീഷണി വല്ലാതെ ഭയപ്പെടുത്തുകയും കുട്ടികളും കുടുംബവുമുള്ള തനിക്ക്​ വാഴ്​സിറ്റിയിൽ ജോലി ചെയ്യാനുള്ള മാനസികാവസ്ഥ ഇല്ലാതാക്കുകയും ചെയ്യുന്നെന്ന്​ അവർ പരാതിയിൽ പറഞ്ഞു. ഇക്കാര്യം ഉന്നയിച്ച്​ വൈസ്​ ചാൻസലർക്ക്​ പരാതി നൽകിയിരുന്നെങ്കിലും നടപടിയെടുക്കാൻ അദ്ദേഹം തയാറായില്ല.

സ്ഥാപനത്തിൽനിന്നു സംരക്ഷണം നഷ്​ടപ്പെട്ടതിനാലാണ്​ വനിത കമീഷനെ സമീപിക്കുന്ന​തെന്ന്​ പരാതിയിൽ പറഞ്ഞു. ജയപ്രസാദിൽനിന്നും ഇനിയും ഭീഷണയുണ്ടാകാനിടയു​െണ്ടന്നും തനിക്ക്​ അതു​ കായികമായി നേരിടാനാവി​െല്ലന്നും കമീഷൻ ഇക്കാര്യത്തിൽ ഇടപെടണമെന്നും പരാതിയിലുണ്ട്​. കമീഷൻ അന്വേഷണം ആവശ്യപ്പെട്ടതിനാൽ സർവകലാശാലക്ക്​ പരിശോധന നടത്തേണ്ടിവരും. സ്വാഭാവിക നടപടിയെന്ന നിലയിൽ അദ്ദേഹ​ം ഇപ്പോൾ വഹിക്കുന്ന സ്ഥാനത്തുനിന്നും മാറ്റിനിർത്തിക്കൊണ്ടായിരിക്കും അന്വേഷണം നടത്തേണ്ടിവരുക. അല്ലാത്ത പക്ഷം പൊലീസിലേക്ക്​ പരാതി നീങ്ങിയാൽ കേസും അറസ്​റ്റും ഉണ്ടായേക്കാം.