കാട്ടുപന്നിയിടിച്ച് കാർ തകർന്നു; ഡ്രൈവർ അത്ഭുതകരമായി രക്ഷപ്പെട്ടു

നീലേശ്വരം: കാട്ടുപന്നികൾ വാഹനത്തിന് കുറുകെ ചാടിയതിനെതുടർന്ന് കാർ നിയന്ത്രണംവിട്ട് അപകടത്തിൽപെട്ടു. ബിരിക്കുളം കരിയാംകൊടലിലെ എ.കെ. സന്തോഷിന്റെ കാറാണ് അപകടത്തിൽപെട്ടത്. കരിയാംകൊടലിനും പുലിയാംകുളത്തിനും ഇടയിലെ പഞ്ഞിക്കുന്ന് കയറ്റത്തിൽ ഞായറാഴ്ച രാവിലെ പത്തിനാണ് അപകടം. മൂന്ന് പന്നികൾ വാഹനത്തിന് കുറുകെ ചാടുകയായിരുന്നു. പന്നികളിലൊന്ന് കാറിൽ ഇടിച്ചതിനെ തുടർന്ന് വാഹനത്തിന് സാരമായ കേടുപാട് സംഭവിച്ചു.

റോഡിന്റെ ഇരുവശങ്ങളിലും കുഴികളും വീതി കുറവുമുള്ള ഭാഗത്തായിരുന്നു അപകടം. സന്തോഷിന്റെ മനസ്സാന്നിധ്യം ഒന്നുകൊണ്ടുമാത്രമാണ് വലിയ അപകടം ഒഴിവായി പരിക്കേൽക്കാതെ രക്ഷപ്പെട്ടത്.