പത്തിലധികം കേസുകളിലെ പിടികിട്ടാപ്പുള്ളി അറസ്റ്റിൽ
text_fieldsസി.എച്ച്. മുത്തലീബ്
കാഞ്ഞങ്ങാട്: കേരളത്തിലെ വിവിധ പൊലീസ് സ്റ്റേഷനുകളിലായി ബലാത്സംഗം, പോക്സോ, വിസ തട്ടിപ്പ്, സ്ത്രീപീഡനം, അടിപിടി, വഞ്ചന തുടങ്ങിയ നിരവധി കേസുകളിൽ പ്രതിയും പല കേസുകളിലും പിടികിട്ടാപ്പുള്ളിയുമായ യുവാവ് അറസ്റ്റിൽ. ചെറുവത്തൂർ തുരുത്തി വില്ലേജിൽ കാടങ്കോട് സ്വദേശിയായ സി.എച്ച്. മുത്തലീബിനെയാണ് കാഞ്ഞങ്ങാട് ഡിവൈ.എസ്.പി എം.വി അനിൽകുമാറിന്റെ നേതൃത്വത്തിലുള്ള സംഘം ഹുൻസൂറിൽ അറസ്റ്റുചെയ്തത്.
ആലുവ ഈസ്റ്റ് പൊലീസ് സ്റ്റേഷനിൽ പോക്സോ കേസ്, ബലാത്സംഗ കേസ്, മലപ്പുറം കരുവാരക്കുണ്ടിൽ ബലാത്സംഗ കേസ്, കായംകുളം, പിണറായി, വിദ്യാനഗർ, തിരുവനന്തപുരം ആറ്റിങ്ങൽ, പാലക്കാട് നെന്മാറ തുടങ്ങിയ പൊലീസ് സ്റ്റേഷനുകളിലെ വിവിധ കേസുകൾ ഉൾപ്പെടുന്നു. കർണാടത്തിലെ വിവിധ സ്റ്റേഷനുകളിലും കേസുകളുണ്ട്.
പ്രതി 26 ഓളം മൊബൈൽ നമ്പറുകൾ ഉപയോഗിച്ചിരുന്നു. സിം കാർഡുകളും ഫോണുകളും പരമാവധി രണ്ടുമാസം മാത്രം ഉപയോഗിക്കും. വാട്സ്ആപ്പ് കോളുകൾ മാത്രമാണ് ഉപയോഗിക്കുക. എസ്.ഐ. സൈഫുദ്ദീൻ നീലേശ്വരം, സി.പി.ഒമാരായ ശ്രീകാന്ത് അരവഞ്ചാൽ, വി.വി. അജയൻ എന്നിവരടങ്ങിയ സംഘമാണ് പ്രതിയെ പിടികൂടിയത്. പ്രതിയെ കോടതി റിമാൻഡ് ചെയ്തു.

