മൊബൈലും റീചാർജും: പരക്കംപാഞ്ഞ്​ രക്ഷിതാക്കൾ

കാസർകോട്​: പള്ളിക്കര പൂച്ചക്കാട്​ കല്ലിങ്കാലിലെ മോ​ട്ടോർ മെക്കാനിക്കാണ്​ വിനോദ്​. സ്​കൂളിൽ പോകുന്ന രണ്ടു മക്കളുണ്ട്​ അദ്ദേഹത്തിന്.​ സവിനയും സവിനന്ദും. കോവിഡ്​ അടച്ചിടലിൽപെട്ടതോടെ മക്കളുടെ വിദ്യാഭ്യാസം ഓൺലൈനിലായി. 'രാവിലെ ആറുമുതൽ മുതൽ വൈകീട്ട്​ എട്ടുവരെ ഓൺലൈൻ പഠനം. പലവിഷയങ്ങളിലെയും അധ്യാപകർ ക്ലാസെടുക്കുന്നു. അതിനിടയിൽ വിക്​ടേഴ്​സ്​ ചാനലും. രണ്ടുപേർക്കും മൊബൈൽ വേണം രണ്ടു മൊബൈലിനായി 35,000 രൂപയോളം ചെലവുവന്നു. അവിടെ തീർന്നില്ല. മുഴുനീള നെറ്റ്​ ഉപയോഗത്തിന്​ റീചാർജ്​ ചെയ്യണമെങ്കിൽ നല്ല പ്ലാൻതന്നെ വേണം. അവർ സ്വന്തംനിലക്ക്​ എ​െൻറ അക്കൗണ്ടിൽനിന്ന് ജീ-പേ വഴി അതുചെയ്യും. 400 രൂപയുടെ റീചാർജാണ്​ പ്രതിമാസം ചെയ്യുന്നത്​. രണ്ടു​പേർക്കുമായി 800 കുറഞ്ഞതുവേണം'. അത്യാവശ്യം വരുമാനമുള്ള രക്ഷിതാവ്​ എന്നനിലയിൽ വിനോദിനാവാം. പക്ഷേ, കോവിഡ്​ കാലത്ത്​ ജോലി നഷ്​​ടപ്പെട്ട പാവപ്പെട്ട രക്ഷിതാക്കൾ എങ്ങനെ പണം കണ്ടെത്തും.

12ാം ക്ലാസുവരെ സൗജന്യ വിഭ്യാഭ്യാസം ലഭിച്ചുവന്നിരുന്ന കേരളത്തിൽ ഇപ്പോൾ സൗജന്യ വിദ്യാഭ്യാസം ലഭിക്കുന്നുവെന്ന്​ പറയാനാവില്ല. രണ്ടുമക്കളുള്ള ഒരു രക്ഷിതാവിന്​ ഒരുവിദ്യാർഥിക്ക്​ ഒരുവർഷം അരലക്ഷം രൂപ കണ്ടെത്തണം. സ്​കൂൾ തുറക്കാത്തതിനാൽ സൗജന്യ യൂനിഫോം സർക്കാറിന്​ നൽകേണ്ടതില്ല. പുതുവസ്​ത്രങ്ങൾ രക്ഷിതാവിന്​ വാ​ങ്ങേണ്ടതുമില്ല. എങ്കിലും കോവിഡിനു മുമ്പുള്ളതിനേക്കാൾ പണം ഇപ്പോൾ മക്കളുടെ പഠനത്തിനുവേണ്ടി കണ്ടെത്തണം.

'ഇപ്പോൾ അധ്യാപകർക്ക്​ തോന്നു​ന്നപോലെയാണ്​ ക്ലാസ്​. എല്ലാ കുട്ടികൾക്കും ഒരുപോലെയല്ല ക്ലാസ്​ കിട്ടുന്നത്​ ഇത്​ നീതിയല്ല. 'റിട്ട. അധ്യാപകൻ ചന്തേരയിലെ സുഗുണൻ മാസ്​റ്റർ പറയുന്നു.

കോവിഡ്​ കാലത്തെ രണ്ടാം അധ്യയനവർഷം ആരംഭിച്ചിട്ടും ഓൺലൈൻ പഠന സൗകര്യം ഇല്ലാത്ത എസ്​.സി–എസ്​.ടി വിഭാഗത്തിലുള്ള കുട്ടികൾ 5117 വരും. ഇതുവരെ അവർ പഠനത്തി​െൻറ പടിക്കുപുറത്തുതന്നെയാണ്​.

'പഠനസൗകര്യം ഇല്ലാത്ത കുട്ടികളെ കണ്ടെത്തി അവരെ സഹായിക്കാനുള്ള നടപടി ആരംഭിച്ചിട്ടുണ്ട്​. പി.ടി.എ കമ്മിറ്റി, സ്​കൂൾതല പഠനസഹായ കമ്മിറ്റി എന്നിവരെ ചുമതലപ്പെടുത്തിയിട്ടുണ്ട്​. തദ്ദേശസ്​ഥാപന​ങ്ങളോട്​ ഫണ്ട്​ നീക്കി വെക്കാൻ ആവശ്യപ്പെട്ടിട്ടുണ്ട്​. എസ്​.ടി–എസ്.സി വിഭാഗത്തിൽ അർഹരായ കുട്ടികളെ കണ്ടെത്തിയിട്ടുണ്ട്​. ഇതെല്ലാം ക്രോഡീകരിക്കുന്ന പ്രവർത്തനമാണ്​ നടക്കുന്നത്​'. വിദ്യാഭ്യാസ ഡെപ്യൂട്ടി ഡയറക്​ടർ കെ.വി. പുഷ്​പ പറഞ്ഞു.

അടച്ചിട്ട ലോകത്ത്​ രണ്ടാം അധ്യയനവർഷം ആരംഭിച്ചിട്ടും രക്ഷിതാക്കൾ മൊബൈലിനും റീചാർജിനുള്ള പണത്തിനും വേണ്ടി പരക്കംപായുന്നു. ഓൺലൈൻ വിദ്യാഭ്യാസം ശക്​തിപ്പെടുത്താൻ ബജറ്റിൽ പണം വകയിരുത്തിയെന്ന്​ പ്രഖ്യപിച്ചിരുന്നു. എന്നാൽ, വിദ്യാർഥികളുടെ രക്ഷിതാക്കൾക്ക്​ മൊബൈൽ വാങ്ങാനുള്ള പണം സഹകരണ ബാങ്കിൽനിന്ന്​ വായ്​പയെടുക്കാനാണ്​ ഉത്തരവിട്ടത്​. ഓൺലൈൻ വിദ്യാഭ്യാസവുമായി ബന്ധപ്പെട്ട കാര്യങ്ങൾ സ്​കൂൾ പി.ടി.എ, പഠനസഹായ സമിതി, സഹകരണ ബാങ്കുകൾ, തദ്ദേശസ്​ഥാപനങ്ങൾ എന്നിവയുടെ ചുമലിലേക്ക്​ തള്ളി, കോവിഡ്​ നിയന്ത്രണത്തി​െൻറ ചുമതല പഞ്ചായത്ത​ുകളെ ഏൽപിച്ചതുപോലെതന്നെ കൈ ഒഴിഞ്ഞിരിക്കുന്നു. നെറ്റ്​ ലഭ്യമായ നഗരകേന്ദ്രങ്ങളിലെ വിദ്യാർഥികൾക്ക്​ മാത്രമായി ഓൺലൈൻ പഠനം പരിമിതപ്പെട്ടു. ടവർ കുറഞ്ഞ മലയോര മേഖലയിലെ കുട്ടികൾ മുറിയുന്ന നെറ്റിലെ പഠനം ഉപേക്ഷിച്ചുപോകുകയാണ്​.