പേപ്പട്ടി ആക്രമണം: ഒമ്പതുകാര​െൻറ വിരൽ നായ്​ കടിച്ചെടുത്തു

കാഞ്ഞങ്ങാട്: കാഞ്ഞങ്ങാട് സൗത്തിൽ ഒമ്പതു വയസ്സുകാര​െൻറ കൈവിരൽ നായ്​ കടിച്ചെടുത്തു. പേപ്പട്ടിയുടെ ആക്രമണത്തിൽ നാലു പേർക്ക് പരിക്കേറ്റു. സാരമായി പരിക്കേറ്റ കുട്ടിയെ മംഗളൂരുവിലെ സ്വകാര്യ ആശുപത്രിയിൽ പ്രവേശിപ്പിച്ചു. ബുധനാഴ്ച രാവിലെ 10ന് കാഞ്ഞങ്ങാട് സൗത്ത്, കൊവ്വൽ സ്​റ്റോർ ഭാഗങ്ങളിലാണ് പേപ്പട്ടിയുടെ ആക്രമണമുണ്ടായത്. കൊവ്വൽ സ്​റ്റോറിലെ ശശിയുടെ മകൻ ദേവദർശി​െൻറ (ഒമ്പത്​) കൈവിരലാണ് പേപ്പട്ടി കടിച്ചെടുത്തത്.

വീടിനു പുറത്ത് കളിച്ചുകൊണ്ടിരിക്കെയാണ് നായുടെ ആക്രമണം. ആവിക്കര സ്വദേശി മൻസൂർ (46), ചെറുവത്തൂരിലെ ലോഹിതാക്ഷൻ (45), ആവിക്കരയിലെ ഷാലുപ്രിയ (20) എന്നിവർക്കും പേപ്പട്ടിയുടെ കടിയേറ്റു. പുതിയകോട്ടയിലും രണ്ടു പേർക്ക്​ കടിയേറ്റതായി നാട്ടുകാർ പറഞ്ഞു.

കടിയേറ്റവരെ ജില്ല ആശുപത്രിയിൽ പ്രവേശിപ്പിച്ചു. കാഞ്ഞങ്ങാടും പരിസരപ്രദേശങ്ങളിലും തെരുവുനായ്​ ശല്യം രൂക്ഷമാണ്. മിനി സിവില്‍ സ്​റ്റേഷന്‍ കേന്ദ്രീകരിച്ചുമാത്രം തെരുവുനായ്ക്കളുടെ പടതന്നെയുണ്ട്.

റെയില്‍വേ സ്​റ്റേഷന്‍ പരിസരത്തും നായ്​ ശല്യം രൂക്ഷമാണ്. പടന്നക്കാട് ഭാഗത്തുനിന്നാണ് പേപ്പട്ടി ഓടിവന്നതെന്ന് നാട്ടുകാര്‍ പറയുന്നു.