12 വയസ്സുകാരിയെ മദ്യം കുടിപ്പിച്ച പിതാവ് അറസ്റ്റിൽ

കാഞ്ഞങ്ങാട്: പന്ത്രണ്ടു വയസ്സുകാരിയെ മദ്യം കുടിപ്പിച്ച പിതാവിനെ പൊലീസ് അറസ്റ്റ് ചെയ്തു. കള്ളാർ മണിക്കല്ല് സ്വദേശിയാണ് മകൾക്ക് മദ്യം നൽകിയത്. അവശനിലയിലായ കുട്ടി ജില്ല ആശുപത്രിയിൽ ചികിത്സയിലാണ്. വീട്ടിൽവെച്ചാണ് കഴിഞ്ഞ ദിവസം വൈകീട്ട് മദ്യം നൽകിയത്. അർധ അബോധാവസ്ഥയിലായ കുട്ടിയെ ബന്ധുക്കൾ ആശുപത്രിയിലെത്തിക്കുകയായിരുന്നു. വിവരം ലഭിച്ച ഉടൻ ആശുപത്രിയിലെത്തിയ പൊലീസ് കുട്ടിയിൽനിന്ന് മൊഴിയെടുത്തു. ജുവനൈൽ ജസ്റ്റിസ് ആക്ട് ഉൾപ്പെടെയുള്ള വകുപ്പ് പ്രകാരം പിതാവിനെതിരെ കേസെടുത്തു. രാജപുരം ഇൻസ്പെക്ടർ വി. ഉണ്ണികൃഷ്ണന്റെ നേതൃത്വത്തിൽ അറസ്റ്റ് ചെയ്ത പ്രതിയെ ഹൊസ്ദുർഗ് ജുഡീഷ്യൽ ഒന്നാം ക്ലാസ് മജിസ്ട്രേറ്റ്-ഒന്ന് കോടതി റിമാൻഡ് ചെയ്തു.