എയിംസ്​: 101ാം ദിനത്തിൽ നഞ്ചുണ്ടസ്വാമി പ​​ങ്കെടുക്കും

കാസർകോട്​: എയിംസ് ജനകീയ കൂട്ടായ്മ കാസർകോട്​ പുതിയ ബസ്റ്റാൻഡ് പരിസരത്ത് നടത്തുന്ന അനിശ്ചിതകാല നിരാഹാര സമരത്തി‍ൻെറ നൂറ്റൊന്നാം ദിവസത്തെ പരിപാടികൾ ഏപ്രിൽ 23 ന് നടക്കും. 101 വനിതകൾ നടത്തുന്ന നിരാഹാര സമരം കർണാടക രാജ്യ റെയ്ത്ത് സംഘം പ്രസിഡന്‍റ്​ ചുക്കി നഞ്ചുണ്ടസ്വാമി ഉദ്ഘാടനം ചെയ്യും. കേന്ദ്രം കേരളത്തിന്​ പ്രഖ്യാപിച്ച എയിംസ്​ കാസർകോട്​ സ്ഥാപിക്കാൻ നടപടിയെടുക്കുകയാണ്​ സമരത്തി‍ൻെറ പ്രധാന ആവശ്യം. ഇതിനായി കേരള സർക്കാർ കേന്ദ്രത്തിനു നൽകിയ പ്രൊപ്പോസലിൽ കാസർകോടി‍ൻെറ പേരും ഉൾപ്പെടുത്തണമെന്ന്​ ആവശ്യപ്പെട്ട്​ ജനുവരി 13 നാണ്​ നിരാഹാര സമരം ആരംഭിച്ചത്​. എൻഡോസൾഫാൻ ദുരന്തങ്ങൾ ആവർത്തിക്കുമ്പോൾ എയിംസ് ജില്ലയിൽ തന്നെയാണ്​ വേണ്ടതെന്നും രോഗമെന്തന്നറിയാതെ കുട്ടികൾ മരിച്ചുതീരുന്നത് ബന്ധപ്പെട്ടവർ കാണാതെ പോകരുതെന്നും സംഘാടകർ പറഞ്ഞു. ഏപ്രിൽ 23 ന് സമരപ്പന്തലിൽ ബാലചന്ദ്രൻ കൊട്ടോട്ടിയുടെ ഫ്ലൂട്ട് , ഈശ കിഷോറിന്റെ നൃത്തം, ഗോകുലും സംഘവും അവതരിപ്പിക്കുന്ന നാടൻ പാട്ട് , ഫ്രൈഡെ കൾചറൽ സെന്റർ തൈക്കടപ്പുറത്തിന്റെ കോൽക്കളി, ചെറുവത്തൂർ കണ്ണങ്കൈ അമ്പലത്തറ മെഹന്ദി വനിതാ വേദി ഒരുക്കുന്നു ഒപ്പന, തിരുവാതിര, ചന്ദ്രൻ കരുവാക്കോടിന്റെ നാടകം പുലി കേശി തുടങ്ങിയവയും അരങ്ങേറുമെന്ന്​ ചെയർമാൻ കെ.ജെ. സജിയും ജനറൽ കൺവീനർ ഫറീന കോട്ടപ്പുറവും അറിയിച്ചു.