യുവതിയെ കബളിപ്പിച്ച് പണം തട്ടി

നീലേശ്വരം: യുവതിയെ കബളിപ്പിച്ച് ബാങ്ക് അക്കൗണ്ടിൽനിന്ന് 1,21,910 രൂപ തട്ടിയെടുത്തു. ചായ്യോത്ത് കുണ്ടാരത്തെ വിനോദ് കുമാറിന്റെ ഭാര്യ കെ.സവിതയുടെ നീലേശ്വരം എസ്.ബി.ഐ ശാഖയിലെ അക്കൗണ്ടിൽ നിന്നാണ് പണം തട്ടിയത്. അക്കൗണ്ടിന്റെ കാലാവധി കഴിഞ്ഞെന്നും അതു പുതുക്കിയില്ലെങ്കിൽ അക്കൗണ്ട് നഷ്ടമാകുമെന്നുംപറഞ്ഞ് കസ്റ്റമർ കെയറുമായി ബന്ധപ്പെടാൻ ഒരു നമ്പർ നൽകി. ഇതുമായി ബന്ധപ്പെട്ടതിന് പിന്നാലെ എസ്.എം.എസ് സന്ദേശം വന്നു. തുടർന്ന് അക്കൗണ്ട് നമ്പറും ഐ.എഫ്.എസ്​ കോഡും മറ്റും കൈക്കലാക്കിയാണ് പണം തട്ടിയെടുത്തത്. ഇതുസംബന്ധിച്ച് സവിതയുടെ പരാതിയിൽ കാസർകോട് സൈബർ പൊലീസ് കേസെടുത്ത് അന്വേഷണം തുടങ്ങി.