ക്രാഫ്റ്റ്-ത്രിദിന സംസ്ഥാനതല ക്യാമ്പിന്​ തുടക്കം

കാസർകോട്​: പൊതുവിദ്യാഭ്യാസ വകുപ്പിന് കീഴിൽ സമഗ്രശിക്ഷ കേരളം, ഹരിതകേരള മിഷൻ എന്നിവയുടെ നേതൃത്വത്തിൽ സംഘടിപ്പിക്കുന്ന ക്രാഫ്റ്റ്-22 ത്രിദിന സംസ്ഥാനതല ക്യാമ്പ്​ കോളിയടുക്കം യു.പി സ്കൂളിൽ മന്ത്രി വി. ശിവൻകുട്ടി ഉദ്ഘാടനം ചെയ്തു. കുട്ടികൾ പ്രവർത്തനാധിഷ്ഠിത പഠനത്തിലൂടെ അറിവുകൾ സ്വായത്തമാക്കുമ്പോഴാണ് പൂർണത കൈവരിക്കുന്നത് എന്ന് അദ്ദേഹം പറഞ്ഞു. അഡ്വ. സി.എച്ച്. കുഞ്ഞമ്പു എം.എൽ.എ അധ്യക്ഷത വഹിച്ചു. എസ്.എസ്.കെ സംസ്ഥാന പ്രോജക്ട് ഡയറക്ടർ ഡോ. എ.ആർ. സുപ്രിയ മുഖ്യാതിഥിയായി. ഹരിതകേരള മിഷൻ അംഗം ടി.പി. പ്രഭാകരൻ സംസാരിച്ചു. എസ്.എസ്.കെ ജില്ല പ്രോജക്ട്​ ഓഫിസർ പി. രവീന്ദ്രൻ പദ്ധതി വിശദീകരിച്ചു. ഹെഡ്മാസ്റ്റർ സി. ഹരിദാസൻ ക്യാമ്പ് വിശദീകരിച്ചു. ജില്ല പഞ്ചായത്ത് പ്രസിഡന്റ് ഷാനവാസ് പാദൂർ, നവകേരളം കർമപദ്ധതി ജില്ല കോഓഡിനേറ്റർ എം.പി. സുബ്രഹ്മണ്യൻ, കൈറ്റ് ജില്ല കോഓഡിനേറ്റർ എം.പി. രാജേഷ്, ജില്ല പ്രോഗ്രാം ഓഫിസർ കെ.പി. രഞ്ജിത്ത്, ബി.പി.സി ടി. പ്രകാശൻ, പി.ടി.എ പ്രസിഡന്റ് ശശിധരൻ കൈരളി എന്നിവർ സംസാരിച്ചു. ഗ്രാമപഞ്ചായത്ത് പ്രസിഡന്റ് സുഫൈജ അബൂബക്കർ സ്വാഗതവും എസ്.എസ്.കെ ജില്ല പ്രോഗ്രാം ഓഫിസർ എം.എം. മധുസൂദനൻ നന്ദിയും പറഞ്ഞു.