ദേശീയപാത: കാർഷിക ഗവേഷണ കേന്ദ്രത്തിലെ ശിലാഫലകം ഓർമയാകും

നീലേശ്വരം: നൂറുവർഷത്തിലധികം പഴക്കമുള്ള നീലേശ്വരം കാർഷിക ഗവേഷണ കേന്ദ്രത്തിലെ ശിലാഫലകം ഓർമയാകുന്നു. 1916ലാണ് നീലേശ്വരത്ത് കാർഷിക ഗവേഷണ കേന്ദ്രം പ്രവർത്തിച്ചുതുടങ്ങിയത്. ആരംഭസമയത്ത് നിർമിച്ച ശിലാഫലകമാണ് ദേശീയപാത വികസനത്തി​ന്റെ ഭാഗമായി മൺമറഞ്ഞുപോകുന്നത്. നീലേശ്വരത്തിന്റെ ചരിത്ര സ്മൃതികളിലൊന്നാണ് കാർഷിക ഗവേഷണ കേന്ദ്രത്തിലെ ശിലാഫലകം. നിരവധി സങ്കരയിനം തെങ്ങിൻ തൈകളും നടീൽ വസ്തുക്കളും പരീക്ഷണം നടത്തി അത്യുൽപാദനശേഷിയുള്ള കാർഷിക ഇനങ്ങൾ കർഷകർക്ക് എത്തിക്കുക എന്ന ലക്ഷ്യത്തോടെയാണ് കാർഷിക ഗവേഷണ കേന്ദ്രങ്ങൾ തുടങ്ങിയത്. ഈ കാലഘട്ടത്തിൽ കാസർകോട്​ ദക്ഷിണ കന്നഡയുടെ ഭാഗമായതിനാൽ, അന്ന് സിമന്റിൽ തീർത്ത ശിലാഫലകത്തിൽ കന്നട അടക്കം മൂന്ന് ഭാഷകളിലാണ് പേരെഴുതി തയാറാക്കിയത്. കാലം കടന്നുപോയതോടെ ശിലാഫലകം കാടുമൂടിക്കിടക്കുകയായിരുന്നു. ഇപ്പോൾ ദേശീയപാത വികസനത്തി​ന്റെ ഭാഗമായി നവീകരണ പ്രവർത്തനം നടക്കുന്നതിനിടയിലാണ് ഫലകമുള്ളതായി പുറംലോകം അറിഞ്ഞത്. ഇങ്ങനെ ഒട്ടേറെ ശിലാഫലകങ്ങളും നൂറ്റാണ്ടുകൾ പഴക്കമുള്ള ദേവാലയങ്ങളും ദേശീയപാത വികസനത്തിന്റെ ഭാഗമായി ഓർമയാവുകയാണ്. പടം: nlr board ദേശീയപാതയോരത്ത് കരുവാച്ചേരി കാർഷിക ഗവേഷണ കേന്ദ്രത്തിലെ നൂറ്റാണ്ടുകൾ പഴക്കമുള്ള ശിലാഫലകം