മാനവികത വിളംബരം ചെയ്ത് ഇഫ്താർ സംഗമം

കാഞ്ഞങ്ങാട്: മാനവികതയും സാഹോദര്യവും വിളംബരം ചെയ്ത് ഇഫ്താര്‍ സംഗമം. കോട്ടച്ചേരി ഹിറ മസ്ജിദിലാണ് സംഗമം നടന്നത്​. കാലം ആവശ്യപ്പെടുന്ന സൗഹൃദത്തിന്‍റെ ദൗത്യമാണ് ഇവിടെ നിര്‍വഹിക്കപ്പെട്ടതെന്ന് സൗഹൃദസംഗമം ഉദ്ഘാടനം ചെയ്ത്​ മുൻ മന്ത്രി ഇ. ചന്ദ്രശേഖരന്‍ എം.എല്‍.എ പറഞ്ഞു. പൊതുസമൂഹത്തിന് നന്മയുടെ സന്ദേശം നല്‍കാനും മാനവിക ഉയര്‍ത്തിപ്പിടിക്കാനും ഇത്തരം കൂട്ടായ്മകളിലൂടെ സാധ്യമാകണമെന്നും അദ്ദേഹം അഭിപ്രായപ്പെട്ടു. ഇത്തരം ഒത്തുചേരലുകള്‍ മാനവികതയുടെ സന്ദേശമാണ് ഉയര്‍ത്തിപ്പിടിക്കുന്നതെന്ന്​ മുഖ്യപ്രഭാഷണം നടത്തിയ ശിഹാബുദ്ദീന്‍ ഇബ്‌നു ഹംസ പറഞ്ഞു. കണ്ണൂര്‍ സര്‍വകലാശാല ചരിത്രവിഭാഗം മുന്‍ മേധാവി ഡോ. സി. ബാലന്‍, കണ്ണൂര്‍ സര്‍വകലാശാല വിദൂര വിദ്യാഭ്യാസ മുന്‍ ഡയറക്ടറും ഗ്രന്ഥകാരനുമായ ഡോ.എ.എം. ശ്രീധരന്‍, മര്‍ച്ചന്‍റ്​സ് അസോസിയേഷന്‍ പ്രസിഡന്‍റ്​ സി. യൂസഫ്ഹാജി എന്നിവര്‍ സംസാരിച്ചു. ജമാഅത്തെ ഇസ്‍ലാമി ഏരിയ പ്രസിഡന്‍റ്​ മുഹമ്മദ് ഷാഫി അധ്യക്ഷത വഹിച്ചു. ഹിറ മസ്ജിദ് ട്രസ്റ്റ് ജനറല്‍ സെക്രട്ടറി ടി. മുഹമ്മദ് അസ്‍ലം സ്വാഗതവും ബി.എം. മുഹമ്മദ്കുഞ്ഞി നന്ദിയും പറഞ്ഞു. hira ifthaar ഹിറ മസ്ജിദില്‍ നടത്തിയ ഇഫ്താര്‍ സൗഹൃദ കൂട്ടായ്മ ഇ. ചന്ദ്രശേഖരന്‍ എം.എല്‍.എ ഉദ്ഘാടനം ചെയ്യുന്നു