ജില്ലയിൽ നിയമപഠനത്തിനു കൂടുതൽ സാധ്യത തെളിയുന്നു

കാസർകോട്​: . ദേളി -സഅദിയ കോളജിൽ എൽഎൽ.ബി കോഴ്​സ്​ അനുവദിക്കുന്നതിന്‍റ ഭാഗമായി ഇന്നലെ സർവകലാശാല സിൻഡിക്കേറ്റ്​ അംഗങ്ങൾ പരിശോധനക്ക്​ എത്തിയിരുന്നു. നിലവിൽ ആർട്​സ്​ ആൻഡ് സയൻസ്​ വിഷയങ്ങളുള്ള സഅദിയ കോളജിൽ പുതിയ കോഴ്​സായിട്ടാണ്​ നിയമപഠനം എത്തുന്നത്​. കോളിയടുക്കത്തായിരിക്കും കാമ്പസ്​ ആസ്ഥാനം. ഈ സ്ഥലവും സിൻഡിക്കേറ്റ്​ അംഗീകരിച്ചിട്ടുണ്ട്​. കണ്ണൂർ സർവകലാശാലയുടെ എട്ടാമത്തെ കാമ്പസായി ഈയിടെ മുഖ്യമന്ത്രി ഉദ്​ഘാടനം ചെയ്ത മഞ്ചേ​ശ്വരത്ത്​ കൂടുതൽ ശ്രദ്ധ കേന്ദ്രീകരിക്കുകയാണ്​ സർവകലാശാല. ഇവിടെ എൽഎൽ.ബി കോഴ്​സ്​ ആരംഭിക്കുന്നതിന്‍റെ നടപടി പൂർത്തിയായിക്കഴിഞ്ഞു. ഇവിടെ നിയമപഠന കോഴ്​സ്​ ആരംഭിക്കാൻ സർവകലാശാല അനുമതി നൽകിയിട്ടുണ്ട്​. ഇതിനുപുറമെ മഞ്ചേശ്വരത്ത്​ ലോ കോളജും ശിപാർശയിലുണ്ട്​. സംസ്ഥാന തലത്തിൽതന്നെ ശ്രദ്ധേയമായ കാമ്പസാണ്​ മഞ്ചേശ്വരത്ത്​ ആലോചിക്കുന്നത്​. ഇതിനുപുറമെ നീലേശ്വരത്തും ലോ കോളജിന് അനുമതി നൽകിയിട്ടുണ്ട്​. നീലേശ്വരം ​ലോ കോളജിനു കഴിഞ്ഞ ബജറ്റിൽ തുക അനുവദിച്ചിരുന്നു. ഇതിനു ബാർ കൗൺസിൽ അംഗീകാരം കാത്തിരിക്കുകയാണ്​. പുതിയ കണ്ണൂർ സർവകലാശാല സിൻഡിക്കേറ്റ്​ കാസർകോട്​ ജില്ലക്ക്​ കൂടുതൽ പരിഗണന നൽകുന്നതിന്‍റെ ഭാഗമായാണ്​ നിയമപഠനം ഉൾപ്പെടെ പുതിയ കോഴ്​സുകളും കോളജുകളും അനുവദിക്കുന്നത്. കൂടുതൽ​ കോളജുകളും പരിഗണനയിലുണ്ട്​. നിയമപഠന കോഴ്​സുകൾ ആരംഭിക്കുന്നത്​ അത്ര എളുപ്പമല്ല. സർവകലാശാലയുടെ തീരുമാനവും സർക്കാറിന്‍റെ അംഗീകാരവും മാത്രം പോരാ. ബാർ കൗൺസിൽ ഓഫ്​ ഇന്ത്യയുടെ അംഗീകാരം വേണം. അഞ്ച്​ ഏക്കർ സ്ഥലവും നാഷനൽ എലിജിബിലിറ്റി ടെസ്റ്റ്​ പാസായ അധ്യാപകരും ഉൾപ്പെടെ ബാർ കൗൺസിൽ അംഗീകരിച്ചിരിക്കുന്ന മാനദണ്ഡങ്ങൾ പാലിക്കുന്നുണ്ടെങ്കിൽ മാത്രമാണ്​ ലോ കോളജിനു അംഗീകാരം നൽകുക. നിലവിൽ മൂന്നുവർഷത്തേക്ക്​ ലോ കോളജുകൾക്ക്​ അനുമതി നൽകേണ്ടതില്ലെന്ന്​ ബാർ കൗൺസിൽ തീരുമാനിച്ചിരിക്കുന്നതിനാൽ രാജ്യത്ത്​ എവിടെയും ലോ കോളജുകൾ ആരംഭിക്കാൻ സാധിക്കുന്നില്ല. നീലേശ്വരം​ ലോ കോളജിന് പ്രധാന തടസ്സമായി നിൽക്കുന്നത്​ ബാർ കൗൺസിൽ യോഗത്തിന്‍റെ ഈ തീരുമാനമാണ്​. ഇതിന്‍റെ പശ്ചാത്തലത്തിലാണ്​ മഞ്ചേശ്വരത്ത്​ എൽഎൽ.എം കോഴ്​സ്​ പാലയാട്​ കാമ്പസിന്‍റെ ഭാഗമായി തുടങ്ങുന്നത്​. പാലയാട്​ കാമ്പസിന് ബാർ കൗൺസിൽ അംഗീകാരമുള്ളതിനാൽ മഞ്ചേശ്വരം എൽഎൽ.എം കോഴ്​സിന് അംഗീകാരം ആവശ്യമില്ല. വിദ്യാഭ്യാസപരമായി പിന്നാക്കം നിൽക്കുന്ന ജില്ലയിൽ കൂടുതൽ കോഴ്​സുകളും കോളജുകളും അനുവദിക്കുന്നതിനുള്ള ശ്രമമാണ്​ സർവകലാശാലയുടെ ഭാഗത്തുനിന്നുണ്ടാകുന്നതെന്ന്​ സർവകലാശാല വൃത്തങ്ങൾ അറിയിച്ചു.