പരപ്പയിൽ ടെക്സ്റ്റൈൽസിന് തീപിടിച്ചു

നീലേശ്വരം: പരപ്പയിൽ വസ്ത്രവ്യാപാര സ്ഥാപനത്തിന് തീപിടിച്ചു. താഴെ പരപ്പ മുസ്‍ലിം പള്ളിക്കു സമീപത്തെ കവിത ടെക്സ്റ്റൈൽസിലാണ് ശനിയാഴ്ച വൈകീട്ട് ആറോടെ തീപിടിത്തമുണ്ടായത്. സ്ഥാപന ഉടമ പരപ്പയിലെ കെ.ടി. ഗ്രേസി കടയടച്ച് വീട്ടിലേക്കുപോയ സമയത്താണ് സ്ഥാപനത്തിൽനിന്ന് പുകയുയരുന്നത് കണ്ടത്. സമീപവാസികൾ ഷട്ടറിന്‍റെ പൂട്ട് തല്ലിത്തകർത്തശേഷം സമീപത്തെ വീട്ടിൽനിന്ന് വെള്ളമെത്തിച്ച്​ തീയണച്ചു. ഷോർട്ട് സർക്യൂട്ടാണ് തീപിടിത്തത്തിന് കാരണമെന്ന് കരുതുന്നു. 50,000 രൂപയുടെ നഷ്ടം കണക്കാക്കുന്നു. വെള്ളരിക്കുണ്ട് പൊലീസ് സ്ഥലത്തെത്തി.