ദേശീയപാത പ്രവൃത്തിക്കിടെ അപകടം, കെ.എസ്.ഇ.ബി ജീവനക്കാരന് പരിക്ക്​

കാഞ്ഞങ്ങാട്: ഐങ്ങോത്ത് ദേശീയപാത നിര്‍മാണ പ്രവൃത്തിക്കിടെ അപകടം. കെ.എസ്.ഇ.ബി ജീവനക്കാരന് ഗുരുതര പരിക്കേറ്റു. നിര്‍മല്‍ നഗര്‍ ഹൗസിങ് കോളനി റോഡിലേക്കുള്ള വൈദ്യുതി തൂണിന് മുകളില്‍ അറ്റകുറ്റപ്പണി നടത്തുന്നതിനിടെ തൂണ്‍ പൊട്ടിവീണ് കെ.എസ്.ഇ.ബി ജീവനക്കാരന്‍ കൊല്ലം സ്വദേശി അരവിന്ദിനാണ് (47) പരിക്കേറ്റത്. സഹപ്രവര്‍ത്തകന്‍ ഗിരീഷും പൊതുപ്രവര്‍ത്തകന്‍ പത്മരാജന്‍ ഐങ്ങോത്തും ചേര്‍ന്നാണ് രക്ഷാപ്രവര്‍ത്തനം നടത്തിയത്. ജില്ല ആശുപത്രിയിൽ എത്തിച്ചെങ്കിലും ഗുരുതരമായതിനാല്‍ മംഗളൂരു സ്വകാര്യ ആശുപത്രിയിലേക്കു മാറ്റി. അരമണിക്കൂറോളം ദേശീയപാതയില്‍ ഗതാഗതതടസ്സമുണ്ടായി. ഡിവൈ.എസ്.പിയുടെ നേതൃത്വത്തില്‍ പൊലീസെത്തി.