കൊടിമര ജാഥക്ക് കാലിക്കടവിൽ ഉജ്ജ്വല സ്വീകരണം

ചെറുവത്തൂർ: കണ്ണൂരിൽ നടക്കുന്ന സി.പി.എം പാർട്ടി കോൺഗ്രസ് നഗരിയിൽ ഉയർത്താനുള്ള കൊടിമര ജാഥക്ക് ജില്ല അതിർത്തിയായ കാലിക്കടവിൽ ഉജ്ജ്വല സ്വീകരണം നൽകി. കയ്യൂരിന്റെ മണ്ണിൽനിന്ന്​ ചൊവ്വാഴ്ച രാവിലെ പുറപ്പെട്ട ജാഥയെ ചെറുവത്തൂരിൽ നൂറുകണക്കിനാളുകൾ വരവേറ്റു. ഉച്ചക്ക് 12ഓടെ കാലിക്കടവിൽ കണ്ണൂർ ജില്ലയിലെ നേതാക്കൾ വരവേറ്റു. മന്ത്രി എം.വി. ഗോവിന്ദൻ, ടി.ഐ. മധുസൂദനൻ എം.എൽ.എ, ടി.വി. രാജേഷ് എന്നിവർ ചേർന്നാണ് സ്വീകരിച്ചത്. സി.പി.എം കേന്ദ്ര കമ്മിറ്റിയംഗം പി. കരുണാകരൻ, ജില്ല സെക്രട്ടറി എം.വി. ബാലകൃഷ്ണൻ എന്നിവർ കൊടിമര ജാഥയെ അനുഗമിച്ചു. കേന്ദ്ര കമ്മിറ്റിയംഗവും ജാഥ ലീഡറുമായ പി.കെ. ശ്രീമതി, സംസ്ഥാന കമ്മിറ്റിയംഗവും മാനേജറുമായ കെ.പി. സതീഷ് ചന്ദ്രൻ എന്നിവർക്ക് സ്വീകരണ സ്ഥലങ്ങളിൽ ഹാരാർപ്പണം നടത്തി. പടം.. കൊടിമര ജാഥയെ ജില്ല അതിർത്തിയായ കാലിക്കടവിൽനിന്ന്​ കണ്ണൂർ ജില്ലയിലെ നേതാക്കൾ സ്വീകരിക്കുന്നു