കോട്ടപ്പുറം ഗവ. വൊക്കേഷനല്‍ ഹയര്‍സെക്കൻഡറി സ്കൂളിന് ഫണ്ട് അനുവദിച്ചു

നീലേശ്വരം: നഗരസഭയിലെ കോട്ടപ്പുറത്ത് പ്രവര്‍ത്തിക്കുന്ന സി.എച്ച്. മുഹമ്മദ്കോയ സ്മാരക ഗവ. ഹയര്‍ സെക്കൻഡറി, വൊക്കേഷനല്‍ ഹയര്‍സെക്കൻഡറി സ്കൂളിന് പുതിയ കെട്ടിടങ്ങള്‍ നിര്‍മിക്കുന്നതിനുവേണ്ടി കാസര്‍കോട് ഡെവലപ്മെന്‍റ് പാക്കേജില്‍ ഉള്‍പ്പെടുത്തി 1.75 കോടി രൂപയുടെ നിർമാണ പ്രവര്‍ത്തനങ്ങള്‍ നടത്തുന്നതിനാവശ്യമായ ഭരണാനുമതി ലഭിച്ചു. പൊതുവിദ്യാഭ്യാസ സംരക്ഷണ യജ്ഞത്തിന്‍റെ ഭാഗമായി, കിഫ്ബി പദ്ധതിയില്‍ ഉള്‍പ്പെടുത്തി സംസ്ഥാന സര്‍ക്കാര്‍ ഒരുകോടി രൂപ അനുവദിച്ച കെട്ടിടത്തിന്‍റെ നിർമാണ പ്രവര്‍ത്തനങ്ങള്‍ പൂര്‍ത്തീകരണ ഘട്ടത്തിലാണ്. പ്രസ്തുത കെട്ടിടത്തിന്‍റെ മുകളില്‍ ഒരുനില കൂടി നിർമിക്കുന്നതിനും വൊക്കേഷനല്‍ ഹയര്‍സെക്കൻഡറി വിഭാഗത്തിന് ടോയ് ലെറ്റ് സൗകര്യങ്ങളോടുകൂടിയ അഞ്ച് ക്ലാസ് മുറികള്‍ പുതിയതായി നിര്‍മിക്കുന്നതിനും വേണ്ടിയാണ് ഇപ്പോൾ തുക അനുവദിച്ചിരിക്കുന്നത്. പുതിയ കെട്ടിടങ്ങള്‍ പൂര്‍ത്തികരിക്കുന്നതോടുകൂടി ഇപ്പോള്‍ അനുവഭപ്പെടുന്ന സ്ഥലപരിമിതി പൂര്‍ണമായും പരിഹരിക്കപ്പെടുകയും സ്കൂളില്‍ മറ്റ് അനുബന്ധ സൗകര്യങ്ങള്‍ ഏര്‍പ്പെടുത്താനും കഴിയും.