പൊറുതിമുട്ടി ജനം

ബസ്​സമരത്തിനു തുടർച്ചയായെത്തിയ പണിമുടക്ക്​ ജനത്തെ ബന്ദിയാക്കി കാസർകോട്​: സ്വകാര്യ ബസ്​സമരത്തിനു തുടർച്ചയായെത്തിയ ദ്വിദിന ദേശീയ പണിമുടക്കിൽ പൊറുതി മുട്ടി ജനം. ബസ്​ പണിമുടക്ക്​ കാരണം ദുരിതത്തിലായ ജനത്തിനുമേൽ ഇടിത്തീയായാണ്​ ദേശീയ പണിമുടക്കു കൂടി അടിച്ചേൽപിച്ചത്​. ഇതോടെ ആറുദിവസമാണ്​ ജനം പുറത്തിറങ്ങാനാവാതെ കുടുങ്ങിയത്​. ബസ്​ ചാർജ്​ വർധന ആവശ്യപ്പെട്ട്​ മാർച്ച്​ 24നാണ്​ സ്വകാര്യ ബസുകൾ അനിശ്ചിതകാല സമരം തുടങ്ങിയത്​. ഞായറാഴ്ച പത്തരയോടെ സമരം പിൻവലിച്ചെങ്കിലും ഭൂരിപക്ഷം ബസുകളും ഓടിയില്ല. പിറ്റേന്ന്​ തിങ്കളാഴ്ച മുതൽ ദേശീയ പണിമുടക്കും. ആദ്യദിവസത്തെ അപേക്ഷിച്ച്​ ചൊവ്വാഴ്ച റോഡിൽ സ്വകാര്യ വാഹനങ്ങളുടെ എണ്ണം കൂടിയെങ്കിലും സർക്കാർ ഓഫിസുകളും പൊതുഗതാഗതവും സ്തംഭിച്ചു. ഉച്ചയോടെ കടകൾ തുറക്കാൻ തുടങ്ങി. എന്നാൽ, കഴിഞ്ഞദിവസം ബലമായി അടപ്പിച്ച പുതിയ ബസ്​സ്റ്റാൻഡിലെ ഹോട്ടൽ ഉൾപ്പടെയുള്ളവ തുറന്നില്ല. കടകൾ അടപ്പിക്കുകയോ റോഡിൽ തടസ്സം സൃഷ്ടിക്കുകയോ ഉണ്ടായില്ല. ജില്ലയിൽ ഒരിടത്തും അനിഷ്ട സംഭവവും ഉണ്ടായില്ല. അതേസമയം, സമരത്തിൽ പ​​ങ്കെടുക്കാത്ത ബി.എം.എസ്​ യൂനിയനിൽപെട്ട ജീവനക്കാർ രണ്ടു കെ.എസ്​.ആർ.ടി.സി ബസുകൾ നിരത്തിലിറങ്ങി. യാത്രക്കാർ കുറവാണെങ്കിലും പണിമുടക്ക്​ ദിനത്തിൽ കൗതുക കാഴ്ചയായത്​. ഡയസ്​നോൺ തള്ളി ജീവനക്കാർ പണിമുടക്കിയാൽ ഡയസ്​നോൺ ബാധകമാക്കുമെന്ന ഉത്തരവ്​ തള്ളി ജില്ലയിലെ ജീവനക്കാർ. ജില്ല ഭരണ സിരാകേന്ദ്രമായ സിവിൽ സ്​റ്റേഷനിൽ ആകെയുള്ള 145 ജീവനക്കാരിൽ 17 പേർ മാത്രമാണ്​ ചൊവ്വാഴ്ച ഓഫിസിലെത്തിയത്​. തലേന്ന്​ തിങ്കളാഴ്ച 13 പേർ എത്തിയ സ്ഥാനത്ത്​ ​കോടതി ഉത്തരവിട്ടിട്ടും അധികമായെത്തിയത്​ വെറും നാലുപേർ. സാമ്പത്തിക വർഷാവസാനമെത്തിയ അടച്ചിടൽ ജീവനക്കാർക്കും പ്രതിസന്ധിയായി. ഒട്ടേറെ ജോലികളാണ്​ മാർച്ച്​ 31നു മുമ്പ്​ തീർക്കേണ്ടത്​. ബുധൻ, വ്യാഴം ദിവസങ്ങൾ മാത്രമാണ്​ ഇനി സാമ്പത്തിക വർഷം തീരാൻ ശേഷിക്കുന്നത്​. ഈ വേളയിൽ സർക്കാർ ഓഫിസുകളിലെത്തുന്നവരെയും കാത്തിരിക്കുന്നത്​ ദുരിതം മാത്രമാവും.