കണ്ണൂർ കലോത്സവം

അഭിപ്രായമെന്തോ ആവട്ടെ, പറഞ്ഞോളൂ മേളയെക്കുറിച്ച്​ എന്തെങ്കിലും പറയാനുണ്ടോ. നല്ലതായാലും അല്ലെങ്കിലും അത്​ രേഖപ്പെടുത്താൻ അവസരമൊരുക്കിയിട്ടുണ്ട്​ സംഘാടകർ. മീഡിയ കമ്മിറ്റിയു​ടെ നേതൃത്വത്തിൽ മേളനഗരിയുടെ മുഖ്യകവാടത്തിനു സമീപമാണ്​ ഇതിനായി ചുമര്​ മാതൃകയൊരുക്കിയത്​. ബഹുവർണ കടലാസിൽ അഭിപ്രായമെഴുതി ഈ ചുമരിൽ പതിക്കാം. മേളയെക്കുറിച്ച്​ തന്നെ ആവണമെന്നും നിർബന്ധമില്ല. പേരും വെളിപ്പെടുത്തണമെന്നില്ല. അതുകൊണ്ടു തന്നെ നിർദേശങ്ങളും അഭിപ്രായങ്ങളും കൗതുകകരമാണ്​. തണ്ണിമത്തന്​ ചുവപ്പ്​ അൽപം കൂടിപ്പോയെന്നാണ്​ ഒരാളുടെ കമന്‍റ്​. കലക്കീട്ടോ തുടങ്ങി ​അഭിനന്ദനങ്ങളും യഥേഷ്ടം. അഭിപ്രായമെഴുതാനും അത്യാവശ്യം തിരക്കുണ്ട്​. photo സെൽഫി കോർണർ... സെൽഫിയെടുക്കാനൊരിടം തിരഞ്ഞ്​ നേരം കളയേണ്ട. കോളജ്​ അങ്കണത്തിൽ ഇൻസ്റ്റഗ്രാം മാതൃകയാണ്​ ഇതിനായി ഒരുക്കിയത്​. കലോത്സവത്തിന്​ എത്തുന്നവരെല്ലാം ഇവിടെയൊന്നുകയറി സെൽഫിയെടുക്കും. പല ആംഗിളിൽ ഫോട്ടോയെടുത്ത്​ ഉടൻ കോളജ്​ വാട്സ്ആപ്​ ഗ്രൂപ്പിലോ എഫ്​.ബിയിലോ ഇൻസ്റ്റയിലോ ഷെയർ ചെയ്യണം. ഇതൊക്കെ തന്നെയല്ലേ മേളയിലെ നേരംപോക്ക്​ എന്നാണ്​ കുട്ടികൾക്ക്​ ഇതേക്കുറിച്ച്​ പറയാനുള്ളത്​. കോളജ്​ തല കലോത്സവംപോലും മുടങ്ങി വർഷം രണ്ടു പിന്നിട്ടശേഷം കിട്ടിയ കൂടിച്ചേരൽ ശരിക്കും ആഘോഷിക്കുകയാണ്​ ഇവർ. മുഖ്യകവാടത്തിലും മരച്ചുവട്ടിലുമെല്ലാം ഫോട്ടോയെടുക്കുന്നവരുടെ തിരക്കുകൂടിയാണ്​ മേളയുടെ വിശേഷം. photo