ഇന്ന്​ വേദിയുണരും

കാസർകോട്​: കലകളുടെ നാട്ടിൽ ഇന്ന്​ നൃത്തച്ചുവടുകൾ അരങ്ങുതകർക്കും. രണ്ടു​ നാൾ നീണ്ട സ്​റ്റേജിതര മത്സരങ്ങൾ പൂർത്തിയാക്കിയാണ്​ വേദികൾ സജീവമാകുന്നത്​. അടച്ചുപൂട്ടൽ നാളുകൾ നൽകിയ വിരസതയിൽനിന്ന്​ മേളക്കാലം കാമ്പസിന്​ നൽകിയത്​ പുത്തനുണർവ്​. കാസർകോട്​, കണ്ണൂർ, വയനാട്​ ജില്ലകളിൽനിന്നുള്ള പ്രതിഭകൾക്കൊപ്പം നാട്ടുകാരുമെത്തിയതോടെ മേള അക്ഷരാർഥത്തിൽ അത്യുത്തരദേശത്തിന്‍റെ ഉത്സവമായി. സ്വകാര്യ ബസ്​ സമരമായിട്ടും രണ്ടാംദിനത്തിലും മേള നഗരിയായ കാസർകോട്​ ഗവ. കോളജിലേക്ക്​ ഒട്ടേറെ പേരാണ്​ എത്തിയത്​. അഞ്ചുനാൾ നീളുന്ന കണ്ണൂർ സർവകലാശാല കലോത്സവത്തിന്റെ സ്റ്റേജ് മത്സരങ്ങൾ മന്ത്രി ഡോ. ആർ. ബിന്ദു ഉദ്​ഘാടനം ചെയ്യും. മുഖ്യവേദിയായ 'മലയാള'ത്തിൽ വൈകീട്ട് നാലിന് നടക്കുന്ന ചടങ്ങിൽ സംഘാടക സമിതി ചെയർമാൻ എൻ.എ. നെല്ലിക്കുന്ന് എം.എൽ.എ അധ്യക്ഷനാവും. രാജ്‌മോഹൻ ഉണ്ണിത്താൻ എം.പി, മാധ്യമ പ്രവർത്തകൻ ഡോ. അരുൺ കുമാർ, ചലച്ചിത്ര താരം മെറിന മൈക്കിൾ എന്നിവർ മുഖ്യാതിഥികളാകും.