ജില്ല പുരുഷ-വനിത സീനിയർ വോളി ചാമ്പ്യൻഷിപ്

ചെറുവത്തൂർ: ജില്ല സ്‌പോർട്‌സ്‌ കൗൺസിൽ, കുണ്ടുപടന്ന ന്യൂ ജോളി ആർട്‌സ്‌ ആൻഡ്‌ സ്‌പോർട്‌സ്‌ ക്ലബ്​ എന്നിവ സംഘടിപ്പിക്കുന്ന ജില്ല പുരുഷ-വനിത സീനിയർ വോളിബാൾ ചാമ്പ്യൻഷിപ് ശനി, ഞായർ ദിവസങ്ങളിൽ ന്യൂ ജോളി ഫ്ലഡ് ലിറ്റ്‌ മൈതാനിയിൽ നടക്കും. 20 പുരുഷ ടീമുകളും നാലു വനിത ടീമുകളും പ​ങ്കെടുക്കും. സംസ്ഥാന, യൂനിവേഴ്‌സിറ്റി താരങ്ങൾ വിവിധ ടീമുകൾക്കായി കളിക്കാനെത്തും. സംസ്ഥാന ചാമ്പ്യൻഷിപ്പിനുള്ള ജില്ല ടീമിനെ മത്സരത്തിൽനിന്ന് തെരഞ്ഞെടുക്കും. ശനിയാഴ്ച വൈകീട്ട് നാലിന്‌ കാരി അമ്പലപരിസരത്തുനിന്ന് ഘോഷയാത്ര നടക്കും. 4.30ന്‌ എം.വി. ബാലകൃഷ്‌ണൻ ഉദ്‌ഘാടനം ചെയ്യും. ഞായറാഴ്ച രാത്രി ഒമ്പതിന്‌ സമാപന സമ്മേളനം എം. രാജഗോപാലൻ എം.എൽ.എ ഉദ്‌ഘാടനം ചെയ്യും. വാർത്ത സമ്മേളനത്തിൽ ടി.വി. കൃഷ്‌ണൻ, രാമചന്ദ്രൻ തുരുത്തി, കെ.എം. ലിബേഷ്‌, കെ.കെ. രാജേഷ്‌, കെ.വി. പ്രദീപ്‌, പി. കൃഷ്‌ണൻ, പി. രാജൻ എന്നിവർ സംസാരിച്ചു.