ബിന്ദുവിന്‍റെ ജൈവ പച്ചക്കറിക്കടയും ഓർമയാകും

നീലേശ്വരം: കൃഷി വകുപ്പിനു കീഴിൽ പ്രവർത്തിക്കുന്ന നാടൻ പച്ചക്കറി വിപണനകേന്ദ്ര സംഘത്തിന്‍റെ പച്ചക്കറിക്കടയും ഇനി ഓർമയാകും. പൊളിക്കാനുള്ള ഊഴം കാത്തുകിടപ്പാണ് ദേശീയപാത തോട്ടം ബസ് സ്റ്റോപ്പിനു സമീപത്തെ നാടൻ പച്ചക്കറി വിപണനകേന്ദ്രം. ആറു വർഷമായി കട നടത്തുന്ന ബിന്ദു ഇനി എങ്ങോട്ട് എ​ന്നറിയാതെ വിഷമത്തിലാണ്. ആകെയുള്ള വരുമാനമാർഗമാണ് ഇല്ലാതാവുന്നത്. ഏതു സമയവും മണ്ണുമാന്തിയന്ത്രത്തിന്റെ കൈകൾ വീഴാൻ കാത്തുനിൽക്കുന്ന ഈ കട അപ്പാടെ മാറ്റിസ്ഥാപിക്കാൻ ഒരു സ്ഥലവും നിലവിൽ ലഭ്യമായിട്ടില്ല. ചെറിയ വരുമാനമാർഗമാണെങ്കിലും ജനങ്ങൾക്ക് വിഷം തളിക്കാത്ത പച്ചക്കറികൾ നൽകുന്നു എന്നതാണ് വർഷങ്ങളായി ഈ കൊച്ചുകടയെ ആളുകൾക്ക്‌ പ്രിയങ്കരമാക്കിയത്. സമീപത്തെവിടെയെങ്കിലും ചെറിയ രീതിയിലെങ്കിലും പച്ചക്കറി വിൽപന നടത്താൻ പറ്റും എന്ന പ്രതീക്ഷയിലാണ് ബിന്ദു. പടം nlr veg, shop തോട്ടം ജങ്ഷനിലെ ബിന്ദുവിന്‍റെ നാടൻ പച്ചക്കറിക്കട