ഡി.എഫ്​.ഒയെ സ്ഥലം മാറ്റിയ നടപടി റദ്ദാക്കണം –എം.എൽ.എ

കാസർകോട്​: ഡി.എഫ്​.ഒയെ സ്ഥലംമാറ്റിയ നടപടി റദ്ദാക്കണമെന്ന്​ സി.എച്ച്​. കുഞ്ഞമ്പു എം.എൽ.എ വനംമന്ത്രിക്ക്​ നൽകിയ കത്തിൽ ആവശ്യപ്പെട്ടു. ജില്ലയില്‍ വനംവകുപ്പുമായി ബന്ധപ്പെട്ട പ്രശ്‌നങ്ങള്‍ പരിഹരിക്കാന്‍ പ്രാപ്തനായ ഓഫിസറെയാണ്​ സ്ഥലം മാറ്റിയത്​. ഇദ്ദേഹം ചുമതല ഏറ്റെടുത്ത് ആറു മാസത്തിനുള്ളില്‍ ജില്ലയില്‍ നടത്തിയ പ്രവര്‍ത്തനങ്ങള്‍ ഏറെ പ്രശംസനീയമായിരുന്നു. വനംവകുപ്പിന്‍റെ പ്രവര്‍ത്തനങ്ങളില്‍ ജില്ലയിലെ ജനങ്ങള്‍ മുന്‍കാലങ്ങളിലേതിനേക്കാള്‍ ഏറെ സംതൃപ്തരാണ്. ജില്ലയില്‍ വനംവകുപ്പും മറ്റു വകുപ്പുകളും തദ്ദേശസ്ഥാപനങ്ങളുടെ കൂട്ടായ്മയിലൂടെ വന്യജീവി ആക്രമണം തടയൽ ഉൾപ്പെടെ പദ്ധതികൾ ആവിഷ്കരിച്ചുവരുകയാണ്​. ഉദ്യോഗസ്ഥനെ സ്ഥലംമാറ്റിയ നടപടി ന്യായീകരിക്കത്തക്കതല്ല. വിഷയം മന്ത്രിയുടെ ശ്രദ്ധയിൽപെടുത്തി കത്ത് നല്‍കിയിരുന്നു. എന്നാല്‍, ഒരു പരിഗണനയും നല്‍കാതെ ഇദ്ദേഹത്തെ സ്ഥലം മാറ്റിയിരിക്കുകയാണ്. തീരുമാനം റദ്ദാക്കി തുടർനടപടി സ്വീകരിക്കണമെന്ന്​ നിവേദനത്തിൽ ആവശ്യപ്പെട്ടു.