കെ.എസ്.ആർ.ടി.സി ജീവനക്കാർക്കെതിരായ ആക്രമണം അവസാനിപ്പിക്കണം

കാസർകോട്: കാസർകോട് ബന്തടുക്ക റൂട്ടിൽ കെ.എസ്.ആർ.ടി.സി ജീവനക്കാർക്കെതിരെ സ്വകാര്യ ബസ് മുതലാളിയുടെ നേതൃത്വത്തിൽ നടത്തുന്ന ആക്രമണം അവസാനിപ്പിക്കണമെന്ന് കെ.എസ്.ആർ.ടി.സി എംപ്ലോയീസ് അസോസിയേഷൻ ജില്ല കമ്മിറ്റി ആവശ്യപ്പെട്ടു. സുജിത ബസ് ഉടമ ബിജുവിന്‍റെ നേതൃത്വത്തിലാണ് കെ.എസ്.ആർ.ടി.സി ജീവനക്കാർക്കെതിരെ നിരന്തരം ആക്രമണം നടത്തുന്നത്. കഴിഞ്ഞദിവസം ബന്തടുക്കയിൽ വെച്ച് ഡ്രൈവർ കെ.പി. സത്യനെ ആക്രമിച്ചു. അതിനുമുമ്പ്​ കുറ്റിക്കോലിൽ വെച്ച് ഡ്രൈവർ വി.ബി. സുരേഷ് ബാബുവിനെ ആക്രമിച്ച് കെ.എസ്.ആർ.ടി.സി ബസിന്‍റെ താക്കോൽ മോഷ്ടിച്ചു. ഇതുസംബന്ധിച്ച് ബേഡകം പൊലീസ് കേസ് രജിസ്റ്റർ ചെയ്തുവെങ്കിലും ജാമ്യം നേടി വീണ്ടും ജീവനക്കാർക്കെതിരെ ആക്രമണം നടത്തുകയാണ്. കെ.എസ്.ആർ.ടി.സി ബസിനും ജീവനക്കാർക്കുമെതിരെ നിരന്തരം ആക്രമണം നടത്തുന്ന ക്രിമിനലിനെ നിലക്കുനിർത്താൻ പൊലീസ് ശക്തമായ നടപടി സ്വീകരിക്കണമെന്ന് ആവശ്യപ്പെട്ട് ജില്ല കമ്മിറ്റി മുഖ്യമന്ത്രി, ജില്ല പൊലീസ് മേധാവി, ഗതാഗതമന്ത്രി എന്നിവർക്ക് പരാതി നൽകി.