മരംമുറി: ഉദ്യോഗസ്ഥർക്കെതിരെ നടപടിക്ക്​ സാധ്യത

കാസർകോട്​: ജനറൽ ആശുപത്രി വളപ്പിലെ മരം മുറിയുമായി ബന്ധപ്പെട്ട് നഗരസഭയിലെ രണ്ട് ഉദ്യോഗസ്ഥർക്കെതിരെ നടപടിക്ക്​ സാധ്യത. ഉദ്യോഗസ്ഥർക്കും കരാറുകാരനുമെതിരെയാണ്​ വിജിലൻസ്​ അന്വേഷണ റിപ്പോർട്ടെന്നാണ്​ സൂചന. കാസർകോട്​ വിജിലൻസ് ഡിവൈ.എസ്.പി കെ.വി. വേണുഗോപാല​‍ൻെറ അന്വേഷണ റിപ്പോർട്ട്​ തിങ്കളാഴ്ച വിജിലൻസ് ഡയറക്ടർക്ക് സമർപ്പിക്കും. ജനറൽ ആശുപത്രി വളപ്പിൽനിന്ന്​ മൂന്ന്​ തേക്കും ഏതാനും​ വാകമരങ്ങളുമാണ് മുറിച്ചു മാറ്റിയത്. റോഡ്​ നിർമാണത്തിനു മുന്നോടിയായി മരങ്ങൾ മുറിച്ചുമാറ്റാൻ നഗരസഭ ചെയർമാ‍ൻെറ അധ്യക്ഷതയിൽ ട്രീ കമ്മിറ്റി തീരുമാനിച്ചിരുന്നു. എന്നാൽ, ടെൻഡർ നടപടികൾ പൂർത്തിയാവുന്നതിനു മുമ്പേയാണ്​ മരങ്ങൾ കരാറുകാരൻ മുറിച്ചുമാറ്റിയത്​. ജനറൽ ആശുപത്രി സൂ​പ്രണ്ട്​ നൽകിയ പരാതിയിൽ ടൗൺ പൊലീസ്​ കേസെടുത്തിരുന്നു. കുറ്റക്കാർക്കെതിരെ നടപടി വേണമെന്നാവശ്യപ്പെട്ട് സി.പി.എം നേതൃത്വത്തിൽ ആശുപത്രിയിലേക്ക് മാർച്ച് നടത്തിയിരുന്നു.