ഒപ്പുമരച്ചുവട്​ ഇനി ഓർമ

പോരാട്ട ചരിത്രമേറെയുള്ള മരം മുറിച്ചുമാറ്റി കാസർകോട്​: അതിജീവന പോരാട്ടങ്ങളുടെ ആ മരച്ചുവട്​ ഇനി ഓർമയിൽ മാത്രം. എൻഡോസൾഫാൻ ദുരിതബാധിതരുടെ പോരാട്ടങ്ങളുടെ നേർസാക്ഷ്യമായി തലയുയർത്തിനിന്ന മരത്തണൽ മാഞ്ഞു. ദേശീയപാത വികസനത്തിന്റെ ഭാഗമായി​ കാസർകോടി‍ൻെറ ഒപ്പുമരത്തിനും മഴുവീണു. ചൊവ്വാഴ്ച രാവിലെയാണ്​ പുതിയ ബസ്​സ്റ്റാൻഡ്​ പരിസരത്തെ ഒപ്പുമരം മുറിച്ചുമാറ്റിയത്​. ദേശീയപാത വികസനത്തിൻെറ ഭാഗമായി നിർമിക്കുന്ന മേൽപാലത്തിനുവേണ്ടിയാണ്​ മരങ്ങൾ വെട്ടിയത്​. കറന്തക്കാട് മുതൽ നുള്ളിപ്പാടി വരെ നിർമിക്കുന്ന മേൽപാലത്തി‍ൻെറ ഭാഗമായി പാതയോരത്തെ മുഴുവൻ മരങ്ങളും മുറിച്ചു. വർഷങ്ങൾക്കുമുമ്പ്​ നട്ട കൊന്നമരമാണിത്. എൻഡോസൾഫാൻ ദുരിതബാധിതരുടെ അവകാശങ്ങൾക്കായി പോരാടിയ എൻവിസാജ് എന്ന പരിസ്ഥിതി സംഘടനയാണ് 'ഒപ്പുമരം' എന്ന പേരിനു പിന്നിൽ. 2011ഏപ്രിലിൽ നടന്ന സ്റ്റോക്​ ഹോം കൺവെൻഷനിൽ എൻഡോസൾഫാൻ രാജ്യാന്തര തലത്തിൽ നിരോധിച്ചതിനെ തുടർന്നാണ്​ സമരങ്ങളുടെ തുടക്കം. ഒരുനാടിനുമേൽ വിഷമഴ വർഷിച്ച കീടനാശിനി ഇവിടെയും നിരോധിക്കണം എന്നാവശ്യപ്പെട്ട് 2011 ഏപ്രിൽ ആറിന് ഒപ്പുചാർത്തൽ സമരം തുടങ്ങി. മരത്തിൽ വെളുത്ത തുണികെട്ടി അതിൽ നിറയെ ഒപ്പുചാർത്തുകയായിരുന്നു ആ സമരരീതി. കേന്ദ്ര-സംസ്ഥാന മന്ത്രിമാരും ജനപ്രതിനിധികളും സ്ത്രീകളും കുട്ടികളും തുടങ്ങി കാസർകോട്ടെത്തുന്നവരെല്ലാം ഒപ്പിട്ട്​ പ്രതിഷേധം അറിയിച്ചു. അങ്ങനെയാണ്​ ഒപ്പുമരമെന്ന പേരുവീണത്​. പ്രതിഷേധ കത്തുകൾ അയക്കാൻ തപാൽപെട്ടിയും മരത്തിൽ സ്ഥാപിച്ചു. എ​ൻഡോസൾഫാൻ നിരോധനത്തിനും തുടർന്ന്​ സുപ്രീംകോടതി ഇ​ടപെടലിലുമെല്ലാം നയിച്ച സമരങ്ങൾക്ക്​ ഒപ്പുമരത്തണൽ വേദിയായി. അന്നുമുതൽ നഗരത്തിലെ എല്ലാ സമരങ്ങളുടെയും കേന്ദ്രവും ഇവിടെയായി. ഖാദി സി.എം. അബ്ദുല്ല മൗലവിയുടെ മരണം അന്വേഷിക്കണമെന്നാവശ്യപ്പെട്ട് നടത്തിയ സമരം 500 ദിവസമാണ്​ പിന്നിട്ടത്​. ഭെൽ-ഇ.എം.എൽ കമ്പനി അടച്ചുപൂട്ടി​യപ്പോൾ ജീവനക്കാരും മാസങ്ങൾ നീണ്ട സമരം നടത്തി. ഇങ്ങനെ പത്തുവർഷത്തിലധികം നീണ്ട പോരാട്ടവേദിയാണ്​​ ചരിത്രത്തിലേക്ക്​ വഴിമാറിയത്​. oppumaram കാസർകോട്​ പുതിയ ബസ്​ സ്റ്റാൻഡ്​ പരിസരത്തെ ഒപ്പുമരം മുറിച്ചുമാറ്റിയപ്പോൾ. മരത്തിൽ സ്ഥാപിച്ചിരുന്ന തപാൽപെട്ടിയും കാണാം