ഭൂമി കൈയേറി നിർമിച്ച ഷെഡുകൾ പൊളിച്ചുനീക്കി

കാഞ്ഞങ്ങാട്: മടിക്കൈ പഞ്ചായത്തിൽ അമ്പലത്തറ വില്ലേജിൽ കാഞ്ഞിരപൊയിൽ സർക്കാർ ഭൂമി കൈയേറി നിർമിച്ച ഷെഡുകൾ റവന്യൂ സംഘം പൊളിച്ചുനീക്കി. കാഞ്ഞിരപൊയിൽ ജങ്​ഷനിൽ റിസർവേ നമ്പർ 146ൽപെട്ട റവന്യൂ ഭൂമിയാണ് പി. ഹുസൈൻ എന്നയാൾ കൈയേറി ഹോട്ടൽ നിർമിച്ചത്. മണ്ണുമാന്തിയന്ത്ര സഹായത്തോടെയാണ് പൊളിച്ചു മാറ്റിയത്. സമീപത്തുള്ള അമ്പിളി കൈയേറി നിർമിച്ച പെട്ടിക്കടയും പൊളിച്ചുമാറ്റാൻ നിർദേശം നൽകി. ഹോസ്ദുർഗ് ഭൂരേഖ തഹസിൽദാർ എം. അൻസാറിന്റെ നേതൃത്വത്തിലുള്ള സംഘത്തിൽ ഹെഡ് ക്വാർട്ടേഴ്‌സ് ഡെപ്യൂട്ടി തഹസിൽദാർ എം.എസ്. ലെജിൻ, അമ്പലത്തറ വില്ലേജ് ഓഫിസർ എം. സുമ, വില്ലേജ് അസിസ്റ്റന്‍റുമാരായ സുരേഷ് പെരിയങ്ങാനം, ടി.പി. വിനോദ്, ഫീൽഡ് അസിസ്റ്റന്‍റ്​ കെ. ഷൈജ എന്നിവരാണ്​ ഉണ്ടായിരുന്നത്.