സമ്പൂർണ ലോക്ക്​...

ലോക്​ഡൗണിനു സമാനമായ ഞായറാഴ്ച തെരുവുകൾ വിജനമായി കാസർകോട്​: കോവിഡ്​ വ്യാപന പശ്ചാത്തലത്തിൽ ഞായറാഴ്​ചകളിൽ ഏർപ്പെടുത്തിയ പ്രത്യേക നിയന്ത്രണം ജില്ലയിൽ പൂർണം. സമ്പൂർണ ലോക്​ഡൗണിനു സമാനമായിരുന്നു ആദ്യ ഞായറാഴ്​ച. കടക​മ്പോളങ്ങൾ തുറന്നെങ്കിലും ആളുകൾ ഇറങ്ങിയില്ല. കെ.എസ്​.ആർ.ടി.സി ഉൾപ്പെടെയുള്ള പൊതുഗതാഗത സൗകര്യവും പേരിനുമാത്രം. ഏതാനും സ്വകാര്യ വാഹനങ്ങൾ മാത്രമാണ്​ നിരത്തിലിറങ്ങിയത്​. പൊതുജനങ്ങളും കാര്യമായി പുറത്തിറങ്ങിയില്ല. കാസർകോട്​ പുതിയ ബസ്​സ്​റ്റാൻഡ്​ വിജനമായിരുന്നു. ചുരുക്കം ചില സ്വകാര്യ ബസുകൾ മാത്രമാണ്​ സർവിസ്​ നടത്തിയത്​. യാത്രക്കാർ കുറവായിരുന്നു. കെ.എസ്​.ആർ.ടി.സിയുടെ 90ശതമാനം ബസുകളും നിരത്തിലിറങ്ങിയില്ല. മംഗളൂരു, സുള്ള്യ, പുത്തൂർ, കാഞ്ഞങ്ങാട്​ തുടങ്ങിയിടങ്ങളിലേക്കാണ്​ സർവിസ്​ നടത്തിയത്​. പത്തോളം ബസുകളാണ്​ ഓടിയതെങ്കിലും യാത്രക്കാർ വളരെ കുറവായിരുന്നുവെന്ന്​ കെ.എസ്​.ആർ.ടി.സി അധികൃതർ പറഞ്ഞു. പുതിയ ബസ്​സ്​റ്റാൻഡ്​, പഴയ ബസ്​സ്​റ്റാൻഡ്​ എന്നിവിടങ്ങളിലെല്ലാം അവശ്യസാധനങ്ങൾ വിൽക്കുന്ന കടകൾ തുറന്നെങ്കിലും ആവശ്യക്കാരെത്തിയില്ല. ലോക്​ഡൗൺ തലേന്ന്​ ആളുകൾ വീട്ടുസാധനങ്ങൾ വാങ്ങിയിരുന്നുവെന്നതാണ്​ പ്രധാന കാരണം. കോവിഡ്​ ​മാനദണ്ഡം പാലിച്ച്​ പുറത്തിറങ്ങിയവരെ പിടികൂടാൻ പൊലീസ്​ പ്രത്യേക സംഘമായി റോഡിലിറങ്ങി. മാസ്​ക്കിടാത്തവരെ നിരവധി പേരെ പിടികൂടി പിഴ ചുമത്തി.