സായിറാം ഭട്ട്: മറഞ്ഞത്​ ജീവകാരുണ്യത്തി‍െൻറ വൻകടൽ

സായിറാം ഭട്ട്: മറഞ്ഞത്​ ജീവകാരുണ്യത്തി‍ൻെറ വൻകടൽ കാസർകോട്​: കണ്ണീരു വീണിടങ്ങളിൽ കാരുണ്യവുമായെത്തുന്ന കടലായിരുന്നു സായിറാം ഗോപാലകൃഷ്ണ ഭട്ട്​. സ്വന്തം കൈയിലെ പണം കൊണ്ട്​ നിർമിച്ചുനൽകിയത്​ 300ഓളം വീടുകൾ, അതിലേറെ സമൂഹ വിവാഹങ്ങൾ, മറുകൈ അറിയാത്ത മറ്റു സഹായങ്ങൾ, തിരസ്കരിച്ച ആഡംബര ജീവിതം എന്നിങ്ങനെ നൂറ്റാണ്ടോളമെത്തിയ കർമനിരതമായ ജീവിതമാണ്, ആ വലിയ മനുഷ്യൻ വിടവാങ്ങു​മ്പോൾ ബാക്കിയാവുന്നത്​. എല്ലാവർക്കും സ്​നേഹവും കുടിയിരിക്കാൻ വീടില്ലാത്തവർക്ക്​ സ്​നേഹത്തിനൊപ്പം വീടും കുടുംബവും നൽകിയ കാരുണ്യപ്രവാഹമായിരുന്നു സായിറാം ഭട്ട്. ആരോടും അദ്ദേഹം വിധേയപ്പെട്ടില്ല, സ്ഥാനമാനങ്ങൾക്കുവേണ്ടി ഒന്നും ചെയ്തില്ല. അ​ദ്ദേഹത്തിന് എന്തുകൊണ്ടും അർഹതപ്പെട്ട പത്മശ്രീ ലഭിക്കാൻ മറ്റുള്ളവർ നൽകിയ അപേക്ഷകൾക്കും അദ്ദേഹത്തെ അടുത്തറിയുന്ന എം.പിയും എം.എൽ.എയും പഞ്ചായത്തും നാട്ടുകാരും നൽകിയ നിവേദനങ്ങൾക്കും ഫലമുണ്ടായില്ല. കർണാടകയോട് ചേർന്നുകിടക്കുന്ന ബദിയടുക്കയിലെ കിളിംഗാറിലാണ് സായിറാം ഗോപാലകൃഷ്ണ ഭട്ട് കഴിഞ്ഞുപോന്നത്​. സാധാരണ ജീവിതം. ആഡംബരങ്ങളില്ല. വൈദ്യവും കൃഷിയുമാണ്​ വരുമാനം. എല്ലാം അധികമാകുമ്പോൾ അത്​ പാവപ്പെട്ട പെൺകുട്ടികളുടെ സമൂഹ വിവാഹമായും ഭവനരഹിതർക്കുള്ള കൂരയുമായി മാറും. സത്യസായി ബാബയുടെ അനുയായി ആയതുകൊണ്ടാണ് സായിറാം ഭട്ട് എന്ന പേരുവീണത്. ബാബ ശൂന്യതയിൽ നിന്നും കാണിക്കുന്ന ജാലങ്ങൾ സായിറാം ഭട്ട്​ ജീവിച്ച്​ കാണിക്കും എന്നുമാത്രം. ലളിതവും അത്ഭുതകരവുമായിരുന്നു ഭട്ടി‍ൻെറ ജീവിതവഴി. കുറഞ്ഞ വിലയുള്ള വെള്ളക്കുപ്പായം, വെള്ള മുണ്ട്, ഒരു വാച്ച് അദ്ദേഹത്തി‍ൻെറ ജീവിത നിലവാര സൂചിക ഇതായിരുന്നു. അനുയായികളും ഭജനസദസ്സുകളും ഇല്ല. താമസിക്കാനൊരു നല്ല വീടും സഞ്ചരിക്കാനൊരു നല്ല വാഹനവും ഉണ്ടായിരുന്നില്ല. പാവപ്പെട്ടവർക്ക്​ വീടുകൾക്കുപു​റമെ കിണറുകളും തൊഴിലും നൽകി. വൃക്ഷത്തൈ വിതരണം, മാസത്തിലൊരിക്കലുള്ള മെഡിക്കൽ ക്യാമ്പ്​, സമൂഹ വിവാഹങ്ങൾ എന്നിങ്ങനെ പോകുന്നു ഭട്ടി‍ൻെറ കർമങ്ങൾ. 1995ലാണ് ജീവകാരുണ്യ പ്രവർത്തനത്തി‍ൻെറ ഭാഗമായി വീട്​ നിർമിച്ചുനൽകാൻ തുടങ്ങിയത്. ബുദ്ധ-ജൈന പാരമ്പര്യത്തിലാണ് സായിറാം ഭട്ടി‍ൻെറ ധർമപാതയുടെ വേരുകൾ ചെന്നു നിൽക്കുന്നത്. പത്മശ്രീ ലഭിച്ചവരു​ടെ പേരുകൾ പത്രങ്ങളിൽ നിറയുമ്പോൾ സായിറാം ഭട്ടിന്​ എന്താണ്​ അയോഗ്യത എന്ന്​ അദ്ദേഹത്തെ അറിയുന്നവർ ചോദിക്കാറുണ്ടായിരുന്നു. ആ വലിയ മനുഷ്യൻ കർമഭൂമിയിൽനിന്ന് വിടവാങ്ങുമ്പോൾ ഈ ചോദ്യം ബാക്കിയാവുന്നു... sairam bhat: ഒരു വീടി‍ൻെറ താക്കോൽ ദാന ചടങ്ങിൽ സായിറാം ഭട്ട്​ കേന്ദ്രമന്ത്രി ജോർജ്​ ഫെർണാണ്ടസിനൊപ്പം