സി.പി. എം ജില്ല സമ്മേളനത്തിന് ഇന്ന് കൊടിയേറും

കാഞ്ഞങ്ങാട്: സി.പി.എം ജില്ല സമ്മേളനത്തിന് വെള്ളിയാഴ്​ച കൊടിയേറും. കേരള രൂപവത്​കരണത്തിനും മുമ്പേ കമ്യൂണിസ്റ്റുകൾ ഭരിച്ചുതുടങ്ങിയ ​ഗ്രാമത്തിൽ ആദ്യമായെത്തിയ സമ്മേളനത്തെ വൻ ആഘോഷത്തോടെയാണ് ജനം വരവേറ്റത്. പതാക, ദീപശിഖ കൊടിമര ജാഥകളെ വരവേൽക്കാൻ വ്യാഴാഴ്ച വൈകീട്ട് നാലരയോടെ വൻ ജനാവലിയെത്തി. ആഘോഷങ്ങൾ പരമാവധി ഒഴിവാക്കി ദീപശിഖാ ജാഥ കയ്യൂരിൽ നിന്നും പതാക ജാഥ പൈവളി​കയിൽ നിന്നും കൊടിമര ജാഥ ചീമേനിയിൽ നിന്നുമാണ് വന്നത്. കൊടിമരം സി.പി.എം കേന്ദ്ര കമ്മിറ്റി അം​ഗം പി. കരുണാകരനും ദീപശിഖ ജില്ല സെക്രട്ടറി എം.വി ബാലകൃഷ്ണനും പതാക സംസ്ഥാന കമ്മിറ്റിയം​ഗം കെ.പി സതീഷ് ചന്ദ്രനും ഏറ്റുവാങ്ങി. ജനശക്തി കലാവേദിയുടെ ബാൻഡ് മേളത്തി​ൻെറ അകമ്പടിയോടെയാണ് ജാഥകളെത്തിയത്. ജില്ല സമ്മേളനം പി.ബി അംഗം എസ്. രാമചന്ദ്രൻ പിള്ള ഉദ്ഘാടനം ചെയ്യും. സംസ്ഥാന സെക്രട്ടേറിയറ്റ് അം​ഗം ആനത്തലവട്ടം ആനന്ദൻ, കെ.കെ. ശൈലജ എം.എൽ.എ എന്നിവർ കഴിഞ്ഞദിവസം രാത്രിയോടെ എത്തി. സംസ്ഥാന നേതാക്കളായ പി.കെ. ശ്രീമതി, ഇ.പി. ജയരാജൻ, ടി.പി രാമകൃഷ്ണൻ, എം.വി ​ഗോവിന്ദൻ എന്നിവരും വെള്ളിയാഴ്ച സമ്മേളനത്തിലുണ്ടാകും. ഞായറാഴ്ചയാണ് സമാപനം. പടം: കൊടിമര ജാഥ സമ്മേളന നഗരിയായ മടിക്കൈയുടെ മണ്ണിലെത്തിയപ്പോൾ