സി.പി.എം: ഏഴുപേരെ ഒഴിവാക്കും; പുതിയ ഒമ്പതുപേർ

കാസർകോട്​: നാളെ നടക്കുന്ന സി.പി.എം ജില്ല സമ്മേളനം പാർട്ടിയുടെ ജില്ല കമ്മിറ്റിയിൽ കാതലായ മാറ്റങ്ങൾ വരുത്തും. നിലവിലെ ജില്ല കമ്മിറ്റിയിൽനിന്നും ഏഴുപേരെ ഒഴിവാക്കാനാണ്​ ആലോചന. ഈ ഏഴുപേർക്കു പുറമെ രണ്ടുപേർ അധികം കടന്നുവരും. 37 അംഗ ജില്ല കമ്മിറ്റി 39 ആയേക്കും. ഒമ്പതു പുതിയ അംഗങ്ങൾ ഉണ്ടാകും. സി.പി.എമ്മി​‍ൻെറ ജില്ലയിലെ സമുന്നത നേതാവും സഹകാരിയും മുൻ എം.എൽ.എയുമായ പി. രാഘവൻ സംഘടനതലത്തിൽ നിന്നും ഒഴിവാകും. നിലവിൽ അദ്ദേഹം വിശ്രമത്തിലാണ്​. അഡ്വ. പി. അപ്പുക്കുട്ടൻ, എം. പൊക്ലൻ, ടി.വി. ഗോവിന്ദൻ, പി.ആർ. ചാക്കോ, എം. ലക്ഷ്​മി, എം.വി. കൃഷ്​ണൻ, ശങ്കർറൈ മാസ്​റ്റർ എന്നിവർ ജില്ല കമ്മിറ്റിയിൽനിന്നും നീക്കം ചെയ്യ​പ്പെടുന്നവരുടെ പട്ടികയിലുണ്ട്. കാഞ്ഞങ്ങാട്ടുനിന്നും എം. രാഘവൻ, ഡി.വൈ.എഫ്​.ഐ ജില്ല ജോ. സെക്രട്ടറി ഷാലുമാത്യു എന്നിവർ പുതുമുഖങ്ങളായി കയറും. അതിനുപുറമെ കാഞ്ഞങ്ങാട്​ ഏരിയ സെക്രട്ടറി രാജ്​മോഹൻ, എളേരി ഏരിയ സെക്രട്ടറി എ. അപ്പുക്കുട്ടൻ, കുമ്പള ഏരിയ സെക്രട്ടറി സി.എ. സുബൈർ എന്നിവർ ജില്ല കമ്മിറ്റിയിലേക്ക്​ സാധ്യതയുള്ളവരാണ്​. ജില്ല സെക്രട്ടേറി​യറ്റാണ്​ മറ്റൊരു ആകർഷണം. സെക്രട്ടേറിയറ്റിലുള്ള പി. രാഘവൻ ഒഴിവാക്കപ്പെടുന്ന സ്​ഥാനത്തേക്ക്​ സി.ഐ.ടി.യു നേതാവ്​ ടി.കെ. രാജൻ കയറിവരും. മന്ത്രിയുടെ പ്രൈവറ്റ്​ സെക്രട്ടറിയെന്ന നിലയിൽ സെക്രട്ടേറിയേറ്റ്​ ചുമതലകൾ നിർവഹിക്കാനാവുന്നില്ല എന്ന കാരണത്താൽ ഒഴിവാക്കപ്പെടുന്ന മുസ്​തഫ തിരുവനന്തപുരം കേന്ദ്രീകരിക്കാൻ സംസ്​ഥാന കമ്മിറ്റിയിൽ വന്നേക്കും. തൃക്കരിപ്പൂർ മണ്ഡലത്തിൽ മത്സരിക്കാനുള്ള വഴികൂടി മുസ്​തഫക്ക് തുറക്കും. ഈ സ്​ഥാനത്തേക്ക്​ സെക്രട്ടേറിയറ്റിൽനിന്നും ആരുകടന്നുവരും എന്നത്​ പ്രധാനമാണ്​. കേന്ദ്ര കമ്മിറ്റി മു​ന്നോട്ടുവെക്കുന്ന പ്രായം കണക്കിലെടുത്ത്​ പി. കരുണാകരൻ കേന്ദ്ര-സംസ്​ഥാന നേതൃത്വത്തിൽനിന്നും ഒഴിവാക്കപ്പെടു​മ്പോൾ അദ്ദേഹത്തെ ജില്ല സെക്രട്ടേറിയറ്റിൽ നിലനിർത്തേണ്ടിവരും. ജില്ല പഞ്ചായത്ത്​ പ്രസിഡൻറ്​ ബേബി ബാലകൃഷ്​ണൻ, എം. സുമതി, ഇ. പത്മാവതി, പി.സി. സുബൈദ എന്നിവരിൽ ഒരാൾ ജില്ല സെക്രട്ടേറിയറ്റിലേക്ക്​ പരിഗണിക്കപ്പെടാം. സംഘടന ചുമതലകൾ കൂടുതലുള്ളത്​ ബേബി ബാലകൃഷ്​ണനാണ്​. അതേസമയം, സംഘടന ചുമതലകൾ നിർവഹിക്കാനാണ്​ എം. സുമതി ബാങ്ക്​ ജോലി രാജിവെച്ചത്​. ഇ. പത്മാവതി ജോലി ചെയ്​തുവരുകയാണ്​. അവർ ജോലി രാജിവെക്കാൻ തയാറായാൽ അവർക്ക്​ മുൻഗണന ലഭിക്കാനിടയുണ്ട്​. പി.സി. സുബൈദക്ക്​ ന്യൂനപക്ഷ പരിഗണനയുമുണ്ട്​. ബേബി, സുബൈദ എന്നിവരിലൊരാൾ വന്നാൽ കാസർകോടി‍ൻെറ തെക്കൻ മേഖലക്ക് സെക്രട്ടേറിയറ്റിൽ കനം കൂടും. അപ്പോൾ പി. ജനാർദനൻ സെക്രട്ടേറിയറ്റിൽനിന്നും മാറിയേക്കാം. സെക്രട്ടറി സ്​ഥാനത്ത്​ ബാലകൃഷ്​ണൻ മാസ്​റ്റർ തുടരും. കെ.വി. കുഞ്ഞിരാമനും കെ.പി. സതീഷ്​ ചന്ദ്രനും സാധ്യതയുള്ളവരായിരുന്നു​. എന്നാൽ, കെ.വി. കുഞ്ഞിരാമൻ ലൈബ്രറി കൗൺസിൽ പ്രസിഡൻറും കെ.പി. സതീഷ്​ ചന്ദ്രൻ കൺസ്യൂമർ ബോർഡ്​ ചെയർമാനുമാണ്​.